Khlem poi ki paidbah kiba pyrshah ïa ka jingtih mawshun ka kompani Shree Cement

Khliehriat, Naitung 31: Ka jingpynsngew paidbah ne ka public hearing kaba la khot pynlong mynta ka sngi ka 31 tarik Naitung 2026 da ka tnat Meghalaya State Pollution Control Board (MSPCB) na ka bynta ka project tih mawshun ka company Shree Cement Ltd na ka par mawshun kaba don ha Lum Syrman ka la ïaid beit ïaid ryntih namar la wan poi ban ïashim bynta tang ki paidbah kiba kyrshan.
Kadei ruh ka Public hearing kaba lyngkot eh ka por kaba la sdang ha ka por 8.00 baje mynstep bad kut 8:46 baje mynstep.
Ki nongïalam Elaka Nongkhlieh ki la pynbeit ban kren tang san ngut halor rynsan bad baroh kiba kren ki pynpaw ba ki ai ka jingkyrshan ïa ka shree cement.
Ki san ngut kiba ai jingkren ki kynthup u Willson Sukhlaiñ, uba dei na ka shnong Tongseng-Nongkhlieh, u bah Nangiaid Pyrshang, uba dei u Waheh shnong Bamkhoosngi, u bah Pynpoibiang Dkhar, uba dei u Waheh shnong Tongseng, bah Fencing Bareh, uba dei u Secretary Elaka Nongkhlieh bad na u Doloi elaka nongkhlieh, u Na-o-kyrmen Sukhlaiñ.
Ha kane ka public hearing kaba na ka bynta ka project jong ka Shree Cement Private Limited, ym shym la don satia uwei ruh uba pyrshah uba poi ban pynsngew ïa ka jingpyrshah jong ki, pynban la sakhi ba tang kiba kyrshan ki la poi sha katei ka jaka.
Kane ka jingbym ïoh lad ban poi ki briew kiba pyrshah ka dei namar ka jingjngai ka jaka bad ka jingsniew palat ka lynti/surok ban poi sha ka jaka ba la pynlong ïa ka public hearing, namar ban poi sha katei ka jaka hap ïaid lyngba ka ahor ktieh kaba shyrkhei kaba ym lah ban ïaid da ki kali, hynrei la hap ban shu leit buh leit shaw ïa ki briew da ka puh shilum lane JCB.
Shisngi shwa kane ka public hearing ka la mih ka jingkulmar ha lynti na ka jingkhang kiba pyrshah ïa ka public hearing namar don kiba la leit lypa sha ka public hearing naduh ka sngi shwa ban pynlong public hearing.
La ïoh jingtip ruh ba mynta ka sngi ki paidbah kiba pyrshah kiba thmu ban leit sha katei ka public hearing ki la shah khang lynti noh kaba dei kawei ka daw ba kim shym la lah ban poi sha ja jaka ba pynlong ïa ka public hearing.
Na ka liang kiba ai jingkren ha rynsan kito kiba ai ka jingkyrshan ïa ka jingwan ka Shree Cement sha katei ka thaiñ Elaka Nongkhlieh, ki la pynpaw ba kin ym poi shano shano ruh lada ki shu im sah kum ki nongrep bad ki sngew donkam ban kiew ban bit ban biang bad pynpaw ruh ba da ka jingwan ka company Shree Cement yn lah ban kyntiew ïa ki paidbah ka thaiñ bad yn lah ruh ban kyntiew ïa ka jingnang jingstad, ki la pynpaw ruh ba ki nongshong shnong kim lah ban phah skul ïa ki khun sha ki jaka ba jngai kum sha ki jaka sor bad da ka jingwan ka Shree Cement ki khun ki kti jong ki kin ïoh ka lad ban leit skul bad pule bad ong ruh ba da ka jingwan ka company yn lah ruh ban ïoh ïa ka lad ïohkam ïohjam.
Katkum ka presentation ba la pynbit pynbiang da ka company la ong ba ka jaka ba la aiwai sha ka Shree Cement ban tih ïa u Mawshun na ka par kaba don ha Lum Syrman ha Elaka Nongkhlieh ka long 217.394 hectare ka jingheh kaba ha ka jingpynlut kaba palat 73 klur tyngka ban sdang ïa ka project. Ka Shree Cement ka don 19 tylli ki karkhana dewbilat ha kylleng ka ri India, kynthup kawei ha UAE.
Na ka liang u Environmental Engineer jong ka tnat MSPCB, u bah Y.F.Laloo, u la ong ba ka tnat kan sa phah ïa ka kaiphot jong kane ka public hearing sha ka State Environment Impact Assessment (SEIA) ban bishar bad ka ban ai pat ïa ka rai.
Ïa ka public hearing la plie da u ADC ka East Jaiñtia Hills District, u bah A. Nongbri bad la pynïaid ïa ka public hearing da u Environmental Engineer jong ka tnat MSPCB, u bah Y.F.Laloo.