Khlem da ïohshimbynta kiba pyrshah ha ka Jingpynsngap Paidbah

Khliehriat Naitung 31: Ki paidbah kiba napoh elaka Nongkhlieh kiba pyrshah jur ïa ka public hearing ba kynthup ki paidbah nongrep lyngba u kyrwoh ki la pynpaw ka jingsngew khia bad sngewsih, sngewdiaw namar ka jingbym iohlad ban iashimbynta ha ka public hearing ba la pynlong mynta ka sngi ha Lum Syrman, ha elaka Nongkhlieh namar ka jingshah khang lynti.
Lyngba u kyrwoh ki la ong “Mynta ka step, kumba ha ka por 6:30 baje mynstep, ngi ki trai jaka bad ki nongrep na Lum Syrman, Shnongrim, ngi la thmu ban leit sha ka jaka ba pynlong ïa ka Public Hearing jong ka Shree Cement Limited ban pynsngew ïa ka sur bad ka hok jong ngi, hynrei ynda ngi la poi ha Lad Shnongrim, ngi la lap ba ki bor pulit ki la ap lypa bad ki la khang lynti ïa ngi ban leit sha ka Public Hearing. Ki la ong ba ym shah ïa kiba pyrshah ban leit sha katei ka jingïalang paidbah. Ngi la kyrpad bad la pynpaw ba ngi dei ki trai jaka bad ki nongrep kiba shah ktah beit da kane ka projek, bad ba ngi kwah tang ban pynsngew ïa ka jingeh bad ka hok jong ngi. Watla katta, ym shym la ai lad satia ïa ngi ban leit, wat hadien ba ngi la pyni ïa ka jingthoh (order) na u Deputy Commissioner ka East Jaintia Hills District kaba bthah ba dei ban ai lad ïa ngi ki trai jaka ban leit sha ka Public Hearing, kumta da ka jingsngewsih kaba khraw, ngi hap ban wan phai noh sha ïing khlem da ïoh bynta ha ka Public Hearing”
“Ngi pynrem jur ïa kane ka jingleh jong ka Sorkar bad ki bor pulit kiba la pynduh bad kyntait ïa ka hok jong ngi kum ki trai jaka bad ki nongrep ban pynpaw ïa ka jingmut bad ka jingïakhun jong ngi ha ka Public Hearing. Kane ka jingleh ka long pyrshah ïa ka nongrim jong ka jingïasyllok paidbah bad ka pynlong ïa ka Public Hearing kaba khlem jingïashim bynta jong ki briew kiba shah ktah beit da ka projek” pynpaw ki paidbah kiba pyrshah ia ka public hearing jong ka Shree Cement.
Kum ban shu pynkynmaw ki paidbah nongrep kiba na elaka Nongkhlieh ki la ju pynpaw ka jingpyrshah jur ïa ka public hearing ka Shree Cement ban tih mawshun na Lum Syrman namar kum ki paidbah nongrep kiba napoh ka elaka Nongkhlieh ki dei kiba ju rep ha Lum Syrman bad ong ruh ba naduh mynshwa ki paidbah nongrep kim pat don kano kano ka jingdie jaka sha ka company Shree Cement, ki pynpaw ka jingsngewsih kthang haba pyrkhat ïa ka jingduh jingdam ki jaka rep ba ka ju rep, ka jingduh jingjulor ki tyllong um bam um dih lada ka company Shree Cement kan leh ïa ka jingtih mawshun na ki jaka ba don ha Lumshyrman, ki la pynpaw ruh ïa ka jingsngew bynñiaw ban duh noh ïa ka mariang kaba itynnad kaba dap da ki dieng ki siej, ki tyllong um kiba pynmih ïa ki um ba bang ba shngiam, ki krem ki kroh kiba don ha ka thaiñ.