Nongpoh, Ïaïong 11: Uwei u rangbah ba la 29 snem ka rta u la duh noh ïa la ka jingim hadien ka jingkylla ka Kali ha ka surokbah National Highway-6 kaba hap ha ka shnong Shangbala ha Ri Bhoi District.
Kane ka la jia ha ka por 4.25 baje janmiet ha kaba ka Kali Tata Ace kaba don ïa u number AS-25-EC- 2365 ba la ñiah da u Md.Maqbool Alam na Borkagaon Bihar ka dang wan na Sonapur da ka jingthmu ban leit sha Nongpoh hynrei hadien ba la poi ha Shangbangla ka la leit ban tynrah ïa ka Centre Divider jong ka surokbah bad kylla khongpong hapdeng surok.
Ha kane ka Kali la don lang ar ngut kiba la shong kiba kynthup ïa u Md Arif (29 snem) na Borkagaon, Bihar bad u MD Ezaj Ansari (26 snem) na Bishnpur Keshar, Bihar.
Katkum ka jingïathuh jong ki Pulit, la ong ba ki ar ngut ki la mynsaw katba u Md. Arif u la khlad noh ha kaba la rah noh ïa ka met jong u sha Civil Hospital Nongpoh na ka bynta ban leh Postmortem.
Halor kane ka jingjia, ki Pulit ka Nongpoh ki la pyntip ruh sha ki bahaïing hasem jong uba la khlad noh bad ka jingtohkit halor kane ka jingjia ka dang ïaid shakhmat.
