Khlad kyndit ka samla pule na Ri-Bhoi ha Rajasthan, ïam pait dohnud ki bahaïing hadien ba wan poi ka met

Nongpoh, Ïaiong 30: Ha kawei ka jingjia kumba iuh tdong bseiñ bad pait dohnud ïaki kmie ki kpa bad ka iing ka sem, kawei ka samla lud ka ba dang 19 snem ka rta na Ri Bhoi District kala khlad kyndit ha jaka pule jong ka haka jylla Rajasthan haka janmiet jong ka 27 tarik mynta u bnai ka ba la wanrah ïa ka jingsngewkyndit bad ka jingbym sngewlah ngeit ïa ki kmie ki kpa bad ki bahaiing hasem katei ka samla ha kaba ki la suba jur ba lehse kadon kaei kaei sha lyndet kaba la pynlong ïa katei ka samla ban duh noh ïala ka jingim ba kordor, ha kaba ki bor pynïaid jong katei ka skulbah kila kynnoh ba kala dih bih bad phasi ïalade.
Katei ka samla kaba la duh noh ïala ka jong ka jingim la tip kyrteng kum ka Walinda Binong naka shnong Nongangang Marngar Ri-Bhoi District kaba dang 19 snem ka rta kaba dei ruh ka khun khatduh jong u Bah Rubi Binong bad ka kong Kobita Syiem, bad katei ka samla ka dei kaba dang pule haka School of Design, Mody University kaba don haka shnong Lakshmangarh, Sikar jong ka jylla Rajasthan bad halor katei ka jingjia naka liang ki bahaïing jong katei ka samla kila pyntip ruh sha ki pulit ka Ri-Bhoi ban leh ïa kaba donkam.
Haba ïathuh halor katei ka jingjia u kpa jong katei ka samla u Bah Rubi Binong u la iathuh ruh ba katei ka samla Walinda Binong ka la leit ban pule sha katei ka skul bah naduh u bnai Risaw jong u snem 2022 bad ka sah ruh ha ka hostel kynthei jong katei ka skulbah shimet, bad ba ka dang shu wan ïing dang ha u bnai Lber ban sah kumba shi taiew eiei ha iing namar ka jingshitom jong ka kmie bad ka la leit phai biang sha katei ka jaka pule ha ka 20 tarik jong u bnai Lber 2023 bad naduh ka sngi kaba la mih na la iing, na ka liang ki bahaiing hasem ki ju phone ban ïakren bad ka bad kam shym la don kano kano ka daw lane ka jingud pang jong ka.
Hynrei kyndit kyndit kumba iuh tdong bsein, u kpa jong katei ka samla u Bah Rubi Binong ha ka 27 tarik mynta u bnai, u la ioh ïa ka phone na ki bor pynïaid jong katei ka skulbah kiba la pyntip ba ka khun ka jong u ka don hapdeng ka jingshitom jur bad bthah ïa u ba un wan sha katei ka skulbah. Hynrei namar ka jingbym ioh ticket liengsuin ha katei ka sngi, u Bah Binong u la leit noh ha ka sngi kaba bud, kata ka 28 tarik bad u la poi sha katei ka skul bah ha ka janmiet jong katei hi ka sngi bad la pyntip ba ka khun jong u kala dih bih bad sdien phasi ïalade.
La iathuh ba ynda u Bah Binong u la poi ha katei ka skulbah, um shym la iohi ïala ka jong ka khun watla u la ong ba u kwah ban peit ïaka hynrei la ïalam ïa u sha ka conference hall ha kaba na ka liang ki nonghikai katei ka skulbah ki la pyntip ba ka khun ka jong u, kam don shuh ha kane ka sla pyrthei da kaba ong ba ka la dih da ka dawai bih bad hadien kata ka la phasi ïalade hapoh ka kamra sah ka jong ka bad ïa ka met ka jong ka, la rah noh sha ka CHC kaba don ha Lakshmangarh, Sikar, Rajasthan.
Na ka liang u Bah Rubi Binong u la pynpaw ia ka jingsngewkyndit bad bym lah ngeit satia ïa ka jingkam jong ki bor ka skulbah ban ong ba ka khun ka jong u kan leh ïa katei ka kam, naba ka dei ka briew kaba shlur bad kaba ym judon satia kum kita ki jingmut ban pynkut ïala ka jingim bad tang lada ka don kano kano ka jingeh kala pyntip beit sha ïing sha ka hynmen jong ka lane sha ka kmie bad u kpa.
Naka liang u kpa jong katei ka samla ryngkat ki paralok kila leit ruh ban wad jingshai na katei ka skulbah hynrei kala pynsuba sniew pynban ïa u kpa ba ki bor pynïaid kila pyrshang ban tap eit miaw pynban bad kim don kino kino ki bor pulit haba rah ïa katei ka samla na jaka sah sha jaka sumar kumba la kynnoh ba kala phasi ïalade, hynrei ki bor jong katei ka skulbah kila sei hi ïaka met khlem ka jingiohi jong u kpa.
Haka juh ka por naka liang u Bah O Binong Rangbah Shnong ka Nongagang u la pynpaw ka jingsngewsih bad ka jingsngewkhia halor katei ka jingjia ba kawei ka samla na katei ka shnong kaba don ruh ka jingkyrmen haka lawei kala duh noh ïala ka jingim tang shiteng por haka rta kaba dang khie dang san, bad kumba ki bahaiing hasem kim pdiang bad kim hun ïaka jingïap jong ka, kum u Rangbah Shnong u la kyrpad sha ka sorkar khamtam ka tnad pulit ba kan shimkhia ban pynlong ka jingtohkit halor katei ka jingjia, naka bynta ka jingshngaiñ jong kiwei ruh ki samla pule kiba ju leit ban trei bad wad jingstad shabar jylla.
Ka met jong katei ka samla kala poi noh mynta ka step ha kad liengsuiñ Guwahati bad naka liang ki bahaiing hasem kila leit shaw ïaka ryngkat ka jingsynran lang jong ki pulit, kaba la wanrah ka jingïam briew ha katei ka shnong halor ka jingkhlad syndet katei ka samla, bad ïa ka jinglehñiam ba khatduh yn sa pyndep lashai ka sngi nyngkong.