Da leilei ruh ngam ngeit ba ka khun kan shim ïa la ka jingim, don kiba bishni ïa ka, ong u kpa

Nongpoh, ïaiong 30: U Bah Rubi Binong u kpa jong ka samla kaba la khlad noh haka jylla Rajasthan u la pynpaw ba da lei lei ruh um lah ban ngeit ba ka khun jong u kan shim ïala ka jong ka jingim da kaba dih bih bad sdien ha u tyllai phasi, namar ka khun jong u ka Walinda Binong ka dei kaba shlur bad kaba ju ïathuh ïaki kmie ki kpa lada ka don jingeh.
Ha kaba ïadei bad ka jingkhlad noh jong ka khun jong u, u Bah Binong u la ïathuh ba dang ha kine ki khyndiat sngi ka khun jong u kala pyntip ba ka don ka Fiesta Fashion Show bad naka liang ki bor pynïaid jong katei ka skulbah kila jied ïaka ban long kum ka nongkren ban pynïaid ïa katei ka prokram bad kala pyntip ruh ba don katto katne ngut ki samla pule kiba kiba sah hostel lang kiba la bishni ïaka halor ka jingshah jied jong ka bad kumta kala phone twad jingmut nala u jong u kpa halor katei ka bynta.
Naka ka liang jong nga kum u kpa hadien ba ki don ki samla kiba bishni ngala ai jingmut ïaka ba kan sangeh noh ba kam dei ban shim bynta ha katei ka prokram, hynrei namar ba duna kiba nang ban kren phareng katei ka skulbah kala jied biang ïa katei ka samla ban long kum ka nongkren ban pynïaid ïa katei ka prokram.
Bad naduh ka 26 tarik ngam shym ioh shuh ban phone ïaka namar ka jingbunkam hynrei kyndit ki bor pynïaid jong katei ka skulbah kila pyntip haka 27 tarik ba ka samla Walinda ka shitom jur bad ki dei ban wanmih mar mar, hynrei ynda poi ha katei ka jaka la ioh jingtip pynban ba ka khun kala dih bih bad sdien phasi, la ïathuh u kpa.
Kaba pynsuba sniew ïanga ka long ba kumno ka khun kan dih bad bih kan sa leit ban sdien ha u tyllai phasi, bad kumno ym don pulit haka por ba ki sei ïaka met jong ka lada ka pynïap ïalade, bad kum u kpa u la pynpaw ruh ba um hun ïaka post mortem bala leh ha CHC ha Rajasthan namar lada ka sidien phasi beit dei ban don tang u dak tyllai ba sdien ba u lah ruh ban ngam shapoh hynrei ki don ruh ki dak kumba kyrshut ha ryndang jong ka, ki dak mong ha kjat bad wat ki shyieng kti jong ka kila lait ba lehse kala don ka jingïakhun ha shuwa ba kan khlad.
Na ka liang u kpa hapdeng ka jingsngewsih bad kthang ka mynsiem halor ka jingduh noh ïala ka jong ka khun u la dawa ruh naka sorkar lyngba ka tnad pulit ba ka dei ban pynlong ka jingtohkit kaba bñiah halor katei ka jingjia khnang ba kum kine ki jingjia kin nym jia shuh nangne shakhmat kumba bun bah ki samla khasi kiba pule shabar bad lyngba kum kine ki jingjia kan pynartatien ïaki kmie ki kpa ban phah wad jingnang jingstad ïala ki jong ki khun shabar ka jylla, u la bynrap.