Khliehriat, Nailar, 23: U samla Kynjaimon Amse na ka shnong Umkiang, East Jaiñtia Hills uba dei ruh u muktiar ba pawkhmat bha ha rilum Jaiñtia u la khladnoh ha ka jingaksiden kaba la jia ha ka por kumba 12.50 mynmiet mynstep ka sngi Thohdieng ha surokbah National Highway-6 ha ka shnong Dkhiah bad lai ngut kiwei pat kiba shong lang hapoh kane ka kali ki la mynsaw jur.
Ïa ka met jong u samla Kynjaimon Amse bad ïa ki lai ngut kiwei pat kiba la mynsaw jur la kit mar mar sha Khliehriat Hospital da u bah Marshal Biam uba la lap ïa kane ka jingjia.
Ki lai ngut kiwei pat kiba la mynsaw ki dei kiba la tip kyrteng kum u Raja Suchen, uba bat kum u Secretary jong ka Shnong Huroi, u Bah Small Lamin na ka shnong Huroi bad u Bah Fulmoon Nongtdu na ka shnong Lad Sutnga.
U Bah Kynjainmon Amse u dei uba bat ruh kum u Assistant Waheh Shnong jong ka shnong Umkiang. U trei ruh mynta kum u muktiar ha ka District Court East Jaiñtia Hills District.
Kum u nongtrei monsngewbha u dei ruh u samla uba ju don ka jingkitkhlieh ïa ka shnong ka thaw, ïa ka imlang ka sahlang jong ki paidbah ka East Jaiñtia Hills District khamtam ki paidbah ka Elaka Narpuh.
Ka jingkhlad kyndit jong une u samla ka long ka jingduh kaba khraw ïa ka East Jaiñtia Hills District bad khamtam eh ïa ka Elaka Narpuh namarba u dei ruh u samla uba ju mih shakhmat ban ïakhun bad ban kren ïa kano kano ka mat kaba ktah ïa ka imlang ka sahlang jong ki paidbah ka thaiñ.
Ka Dorbar Shnong Umkiang, lyngba u Waheh Shnong u Bah Lasting Pala bad u Secretary jong ka shnong Umkiang u Bah Nicholas Lyngdoh ki la phah ïa u kyrwoh sngewlem sha ki bahaïing hasem jong u Bah Kynjaimon Amse halor ka jingkhladnoh kyndit kaba khlem poi pyrkhat.
“Ai ba u Mynsiem jong u Blei un pyntngen ïa phi ka kmie, u kpa bad ïa ki bahaïing hasem halor kane ka jingkhlad kyndit u Bah Kynjaimon Amse. Ym lah ban len ba kane ka long ruh ka jingduh kaba khraw ïa ka shnong ka thaw, ka thaiñ hi baroh kawei. Leit suk Bah Kynjaimon Amse hakhmat u Blei. To nang kyrkhu ïa ngi ka shnong ka thaw, ka ïing ka sem,” pynkut u kyrwoh.
