Ka rukom kanbas ne ïalap election ha ki por ba mynshwa bad mynta ka la ïapher bak ly bak namar ha ki por ba mynshwa haba u kyrtong u leit ïalap ha kano kano ka shnong ne ka dong ki ban mih bad sngap ïa u kin dei tang kito ki nongshong shnong ha kato ka jaka hynrei mynta pat haba u kyrtong u leit ban ïalap election sha kano kano ka shnong ne jaka la khih win lut ki shnong ki thaw namar ki la ïakhreh ïa khrum ban ïamih ban leit synran bad pynshngaiñ ïa u kyrtong.
Ka jingkylli kaba mih balei kane ka jia kumne hato ka dei shisha thik kumba la kynnoh da mano re ba mynta haba ki leit synran lang ïa u kyrtong ki ïoh beit da ka bai nong sngi kaba long ar haduh lai shah ïa kaba ki ïoh lada ki leit bylla sngi. Dei na kane ka daw ba wat la ki hap ban duh ka trei ka ktah ruh kim salia ban leit bud beit ïa ki kyrtong ba ki kyrshan.
Nalor kata ha ki por ba mynshwa haba uno uno u kyrtong u ïakhun ne ïa aireng bunsien dei ki paidbah kin ban kyrshan ïa u ne ka. Don kiba leit ai da ka pisa, don kiba leit ai da ki mar rep mar riang kum u khaw u kba, ki jhur ki jhep bad da kine ki ïashet bad ïatiew ban ïabam ja lang ha ka sngi ba jop ne rem ne ha ki sngi ba dang ïaid ka jingleit ïalap election kylleng kylleng. Namar ki ban bud ïa ki kyrtong kin dei tang ki nongïalam ym ki paidbah.
Kane ka jingkylla ka long dang ha kine ki ar ne lai samoi ei ei bad ka daw ka long ruh ba la sdang jur ka jingïatheh tyngka. Mynta ban ïakhun ïa ka election donkam da ki klur tyngka la ka dei ha sor ne ha nongkyndong ruh hynrei mynshwa lada don tang ka bai umphniang ban leit kanbas kylleng ki jaka tang katta la biang. Namar ka bam ka dih la pynkhreh lypa hi kito ki shnong kiba leit ban kanbas ne ïalap election. Hynrei mynta pat tang ka bai bam ban pynkhreh ïa ki nongwan synran ruh ka long da ki phew phew lak tyngka.
Kumba long mynta ka VPP bad ka KAM ki la sdang ban phai sha ka juk kaba rim ban pan ka jingkyrshan bad jingïarap na ki paidbah ban ïakhun ïa ka election. Hynrei hato kane kan dang lah ne em ban pynkylla ïa kaei kaba la jia ha kine ki por ba mynta namar mynta kiba bun ki ïabeh beit sa tang ïaka pisa. Lada dei naduh ki samla haduh ki rangbah ruh, tang shu ber pisa la klet bad matlah lut. Dei na kane ka daw ba bunsien ki kyrtong haba ki la jop ki hap ban pyrkhat da kiei ki lad ki lynti ban lum bad ban kynshew khnang ban pynmih ïakaei kaba la pynlut bad kumno ban lum ban pynkhreh pat na ka bynta ka san snem ban wan.
Imat na kane ka daw kumba long mynta ym da don than shuh kita ki nongmihhmat ki ban pyrkhat sani kumno ban wanrah ïa ki aiñ ki kanun ki ban ïada ïa ka ri bad ka jaidbynriew bad kiei ki polisi treikam ki ban ai kam ai jam ïa ki khun samla. Ka por ka dawa ba la donkam ïa kita ki nongmihkhmat kiba ïohi jngai kiba lah ban thaw aiñ, kiba lah ban thaw ïa ki polisi treikam jongka sorkar ym shuh ban shaniah tang ha ki ophisar sorkar namar ki ophisar ki wan bad ki leit kim shym don ka mynsiem ban shim khia na ka bynta ka jylla. Namar ki tip shai ba kaba kut jongki kam dei ha kane ka jylla hynrei kin leit phai bad pynkut sha la ki jong ki jong ki jylla.
Kumta ka jingkhot ïa ki paidba ka long to kyndit bynriew ban bishar bniah bha ka por ka dang don kiba kum kino ki nongmihkhmat phin jied ym kito ki ban shu leit bad shong ha Assembly shi kyntien ruh ym lait ang san snem lynter. Jied da kiba nang ban kren, ban thaw aiñ, thaw polisi bad kiba don ka jingïohi jngai na ka bynta ka bha ka miat ka ri bad ka jaidbynriew.
