Mawkyrwat, ‘Nailar 11: U Director jong ka Minerals Resources, Shillong u la pyntip ïa ki nongïalam shnong bad ïa ki paidbah ba ka jingtih be-aiñ ïa u dewïong khlem ki tiar ka juk mynta ka long be-aiñ bad ka ktah ïa ka koit ka khiah ki briew bad ïa ka mariang bad ka jingduhnong ïa ka sorkar.
Kumta, dei halor kine ki daw ba ka National Green Tribunal (NGT) ha u Ïaïong, 2014, ka la khang pyrshah ban tih dewïong be-aiñ ha ka jylla Meghalaya kumjuh ka Ingbishar Supreme Court katkum ka hukum ba la pynmih ha ka 3 tarik, ‘Naitung, 2019 ka la bthah ba la shah ban tih dewïong hapoh ka jylla katkum ka Mines & Minerals (Development & Regulation) Act, 1957.
Lah ruh ban kdew hangne ba haduh mynta ka Sorkar ka khlem ai wai ïa uno uno u briew ne ïa kano kano ka Firm halor ka kam tih dewïong namar kane ka kam ka long be-aiñ hapoh ka jylla.
Namarkata, la kyrpad ïa ki shnong, ki nongïalam shnong bad ki ‘riew paidbah ba lada don kano kano ka jingtih bad shalan dewiong be-aiñ hapoh ka distrik kin ai jingpyntip marmar sha u Deputy Commissioner, sha u Superintendent of Police, sha u Sub Divisional Officer (Civil), sha u SDPO, sha u Block Development Officers, sha u Director of Mineral Resources, Mining & Geology Department khnang ban ïoh leh ïa kaba donkam.
