Nongpoh, Naitung 22: Kawei ka trok kaba kit ïa u khaw jong ka Food Corporation of India (FCI) ka la kem ding kynsan ha Umsning By-Pass ha Ri-Bhoi District mynta ka janmiet sngi Balang, hynrei donbok ba ha kane ka jingjia ym shym don ba mynsaw ne kano kano ka jingjia ba sngewsih lait noh tang ka jingjulor ka trok.
Katkum ka jingtip bala ioh lum, kane ka jingjia kala jia haka por 5:30 eiei janmiet ha kaba katei ka trok kaba don ïa u registration number AS 01 FC 8674, kaba la ñiah da u Farijul Hoque, ka dang thmu ban leit pynpoi ïa u khaw sha Jowai hynrei ka la kem ding kynsan ha ka jingïaid lynti. La suba ba kane ka jingjia ka lah ban dei na ka jingkem ding ki waiar shapoh ka trok.
Tang mar ïa ïoh jingtip halor kane ka jingjia, ki pulit pynlip ding jong ka Fire & Emergency Services na Umiam ki la poi mar mar sha katei ka jaka ban pynlip ïa ka ding shuwa ba kan pur shuh shuh.
Da ka jingïatrei shitom jong ki pulit pynlip ding, la lah ban tehlakam ïa ka ding bad lait na kino kino ki jingjia kiba sngewsih. Watla u nongñiah u la lait im khlem kino kino ki jingmynsaw, hynrei ka trok ka la julor jur namar ka jingkem ding bad naka liang ki pulit ki dang pynlong ka jingtohkit halor kane ka jingjia ban lap ïaka daw tynrai.
