Kem mardor ïa ka LRO ba donkti ban pynthoh bria halor ka jingjia ha Mahadev Khola : KSU

Shillong, Naitung 31 : Ki nongïalam ka Khasi Student’s Union hynne ka sngi ki la leit ai sakhi ha Lumdiengjri Police Station halor ka ejahar ba ki ujor ha ka taiew ba la dep pyrshah ïa ka LRO, da kaba ong ba katei ka kynhun ka la pynthohbria ïa ka KSU bad pyrshang ruh ban wanrah ka jingïapher niam.
Ki nongïalam ka Seng hapoh ka jingïalam jong u Bah James Hitler Mawphniang, Legal Affairs Secretary haba kren bad ki lad pathai khubor hadien ba ki la dep ban wan ai sakhi, ki la ïathuh ba mynta kadei ka kamram jong ki pulit ban kem sa ïa kitei ki briew ba donkti ha katei ka kam.
“Ka Police Department kadei ban leh ei ei ïa kane khamtam haba ïadei bad ka jingpynshit niam, pynisih jaidbynriew jong ka LRO namar lyngba kine ki jingthoh ba ka buh ha ka twitter ki saphriang sha kiwei pat ki rynsan jong ki social media bad kata kadei kaba ngi kyntu ïa ki pulit ban shimkhia,” u la ong.
Shuh shuh u ong ruh ba ki pulit ki pyntip ba ïa katei ka rynsan social media jong katei ka kynhun la leh da ki briew kiba nabar bad ba mynta ki dang wad ïa kito kiba donkti.
Shwa kane, utei u nongïalam ka Seng u ïathuh ba ka jingujor jong ki da ka ejahar kadei hadien ba ka la mih ka jingkynthoh ïa ka seng bad ruh wat ïa ki nongïalam jong ki balang bapher bapher da kaba pynwandur ïa ka jingjia ha Mahadev Khola.
“Ngi pynshai ruh ba ka Seng ka khlem don bynta ei ei bad katei ka jingjia bad kumta ki pulit ki dei ban tohkit kham kloi.”
Na ka liang ki nongïalam ki ong ruh ba ki kwah ban pynshai ba ka jingjïa ha Mahadev Khola kam dei satia kaba don bynta da ka KSU lane da kino kino ki kynhun niam.