Khliehriat, K’lyngkot, 22: Ki Pulit jong ka East Jaiñtia Hills District ha ka sngi Thohdieng ki la kem noh ïa uwei u briew halor ka jingkynnoh ba u la jrong kti ïa kawei ka khynnah kaba la 14 snem ka rta da ka jingthmu ban batbor ha ka 11 tarik mynta u bnai ha kawei ka shnong kaba dang hap hapoh u pud u sam jong ka East Jaiñtia Hills District hadien ba ka kmie jong kane ka khynnah ka la mudui da ka ejahar ha ka sngi kaba bud ha ki bor Pulit.
La kynnoh ba kane ka khynnah bad kmie jong ka ki la shah shoh pynmynsaw ha une u runar.
Ka kmie jong kane ka khynnah katba ka dang shong ha dukan, utei u runar ha ka 1 tarik mynta u bnai u la dung pynmynsaw ïa u kurim jong ka na ki bynta jong ka krung. Kane kmie jong kane ka khynnah ka la ong ba ka la shu ïai shah namarba kam dei ka trai shnong bad kumta ka la shu ïasuk noh.
Hynrei la ong ba ha ka 11 tarik mynta u bnai, utei u runar u la wan rung biang ha dukan jong ka da ki ktien byrngem byrsit bad la kynnoh ruh ba u la byrngem ban batbor ïa ka khun jong ka kaba dang 14 snem ka rta.
La kynnoh ruh ba ym tangba u la byrngem byrsit hynrei ula sdang wat ban jrong kti ïa ka khun kynthei bad pynmynsaw ruh ïa ka na ki bynta jong ka khmat, ka shkor bad ka met ka phad.
“U la byrngem bad shoh ruh ïa nga katba nga dang pyrshang ban ïada ïa la ka jong ka khun, kumta ha ka 12 tarik, Kyllalyngkot, 2023 nga la leit ujor da ka ejahar ha Khliehriat Women Police,” ong ka kmie.
Nalor kata, kane ka longkmie ka la ïathuh shuh shuh ba ha ka 15 tarik mynta u bnai utei u runar u la wan rung biang ha dukan da kaba rah ha kti ïa ka wait ryngkat ka byrngem byrsieh.
“Ha ka jingsheptieng ngam shym la plie ïa ka ïing, kumta nga pyntip noh sha ki Pulit ka Umpleng da ka telephone bad ki Pulit kiba la wan marmar hynrei kim shym la ïoh satia ban kem ïa u namarba u la phet noh bad ha ka 20 tarik mynta u bnai u la wan ban panmap na nga, hynrei nga ong ba ngam lah ban leh eiei namarba nga ladep buh da ka ejahar. Kumta nga la telephone biang ïa ki Pulit,” ong kane ka longkmie.
Ka la ïathuh ba ki Pulit ruh ki la shimkhia ban ai jingïada ïa ka bad namar ka jingsheptieng ka la leit sah noh sha iing ki paralok. Ka la ïathuh ruh ba dei ha ka miet ba ka la leit sah sha iing ki paralok ka iing shongwai jong ka, ka la shah wiang ding bad ki thylliej ding ki la bamduh lut ïa ka ing baroh kawei bad baroh ki jingdon jingem.
