Nongpoh, Naiwieng 15: Ki pulit jong ka Ri Bhoi hadien ka jingtip kaba bñiah mynta ka sngi kila ioh ban kem 2 ngut ki briew kiba thmu ban shalan beiañ ïa ki biskit ksiar ba shongdor da ki klur tyngka.
Katkum ka jingtip bala ioh lum la ïathuh ruh ba naka liang ki pulit kila pynlong ka jingpynap shrip ha Byrnihat mynta ka sngi bad ioh ban bat ïa kawei ka kali Scorpio kaba don ïa u Registration Number AS 01 EJ 6407 kaba la suba da ki pulit, bad haka jingtalasi naka liang ki pulit kila lap ïaki biskit ksiar kumba 20 tylli ba shongdor da ki klur tyngka kiba dang wan naka thaiñ Ladrymbai bad thmu ban leit sha Assam.
Hadien ka jingioh kurup ïa kitei ki ksiar naka liang ki pulit kila kem noh ïa 2 ngut ki briew ba donkti ha katei ka kam bala tip kyrteng kum u Abdullah Hussaiñ bad u Sanborlang Khaiong bad la register case pyrshah ïaki bad naka liang ki pulit ki dang pynlong ka jingtohkit ban lap shuh shuh ïa kiba donkti ha katei ka kam.
