Shillong, Naitung 10 : Ki shipai ïada khappud ki Border Security Force (BSF) ha ryngkat ka Ri War Development Organisation (RWDO), mynta ka sngi, ki la ïoh ban kem ïa 3 ngut ki khar Bangladesh bad kurup ïa 3 tylli ki wait, kiba ju wan ban pom tuh ïa ki dieng ki siej, ki dieng kwai ha ki thaiñ Tishang bad Nongjri, East Khasi Hills.
ïa kine ki khar Bangladesh la ïoh kem na kawei ka jaka ba don ka liew muri kaba ksam lyngba sha u pud u sam ka shnong Tishang Nongjri.
Kane ka jingjia ka la jia hadien ka jingïalang kaba long hapdeng ka RWDO bad ki shipai BSF, kaba ïakren halor ka jingrung tuh ki nong Bangladesh sha ki bri ka thaiñ ban pom tuh ïa ki dieng ki siej bad ki dieng kwai nalor ka jingtuh ïa ki mar rep.
Kat kum ka jingïathuh ki Nongïalam ka RWDO, ki nong Bangladesh ki ju wan rung tuh man ka por sha ka thaiñ bad ki ju byrngem ruh wat ïa ki nongtrei bri ban pom da ka wait lada ki pyneh bad beh ïa ki na ka jingpom dieng.
Ki ïathuh ba ha ka 8 tarik Naitung, ka seng kala leit ïakynduh ïa ki shipai BSF ban ïakren halor kane ka kam hynrei dei ha ka por ba ki wan phai, ki la ïohi ïa ki khar Bangladesh kiba mut rung tuh sha u pud ka Shnong Tishang Nongjri lyngba ka thliew murui ba don jingkieng.
Ki Nongïalam ka seng kila pyntip mar mar sha ki shipai BSF kiba pahara hajan kane ka jingkieng, ban beh thong bad kem ïa kine ki khar Bangladesh.
Ki ïathuh ba mynta ka sngi ha ka jingïatreilang bad ki BSF, ka seng ka la ïoh ban kem noh ïa 3 ngut ki khar Bangla katba ki dang tuh dieng bad la ïoh ruh ban kurup noh ïa ki dieng nalor ki wait ba ki rah. ïa kine ki khar Bangladesh la aiti noh sha ki Pulit ba kin leh ïa kaba donkam.
Ka RWDO ka la phah ktien ruh sha ka Sorkar Pdeng lyngba ki shipai BSF ba ka Sorkar kan pyndep noh kham kloi ïa ka jingker sainar shiah nalor ban buh ruh ïa ki kor CCTV ha ki thaiñ khappud khnang ba yn lah ban tehlakam ïa ka jingwan rung tuh ki khar Bangladesh.
