Shillong, Risaw 25 : Ka Sorkar Jylla kala rai ban phah siang rong thymmai ïa baroh ki surok kiba kongsan, kiba don ha kylleng ki jaka ka sor Shillong lyngba ka Smart City Phase II.
Haba pyntip ïa kane mynta ka sngi Thohdieng, u Symbud Myntri Rangbah ba khmih ïa ka kam pynroi sor u Ma Sniawbhalang Dhar ula ong “Ka Tnad PWD kala pynkhreh ïa ka mang pisa ban siang rong thymmai ïa baroh ki surok ba kongsan ha sor khnang ba ngin ïoh ïa ki surok kiba bha”.
Kane ka rai ka dei kaba la shim hadien ba kala Sorkar kala rai ban ym pyntreikam shuh ïa ka smart road jong ka Smart City project, hadien ka jingshem ba ka project kam ïahap satia.
“Kane ka dei ka Smart City phase-II. Balei ngi pynsangeh noh namar ki don katto katne ki jingeh, ka project kam lah ban ïaid shakhmat. Ha ka jaka jong ka, ngi la pyrshang ban bujli na ka Sorkar Jylla da kaba siang rong thymmai ïa ka surok ba kot kumba 40-50 km hapoh ka sor” ula ong.
Haba kylli, u Ma Sniawbha ula pyntip ba un sa pan ïa ki jingtip na ki Ophisar halor ka jinglong jingman jong ka smart road ba pulom ha Lachumiere bad lano ba yn saplie noh ïa ki paidbah ba kin pyndonkam ïa ka.
