Katkum ka jinglum jingkheiñ la nang kiew bha ka kyrtong NPP, ong u Bah Sniawbhalang

By Mawphor Editor On Oct 26, 2024

Urban Affairs Minister Sniawbhalang Dhar. (Photo by Sanjib Bhattacharjee).

Shillong, Risaw 25: U National General Secretary ka National People’s Party (NPP) bad u Symbud Myntri Rangbah ka jylla u Bah Sniawbhalang Dhar ha ka sngi Thohdieng u la ong ba katkum ka jinglum jingkheiñ ka la pyni ba ka kyrtong jong ka party ban ïakhun ïa ka elekshon shiteng samoi na Gambegre ka la kiew shakhmat haba ïa nujor bad kiwei pat.
“Kumba ka long mynta la ïoh jingtip ba ka kam ka long kaba bha naduh na madan ha kane ka jingïakhun. Ka kyrtong jong ngi ka la kiew bha shibun haba nujor bad kiwei ki kyrtong kiba ïakhun ha kane ka elekshon,” ong u Bah Dhar sha ki lad pathai khubor.
Haba kyrpad ïa ki nongshong shnong ka Gambegre ban vote ïa ka kyrtong ka NPP, ka Dr Mehtab Chandee A Sangma, kaba dei ruh ka tnga jong u Myntri Rangbah u Conrad K Sangma, u Symbud Myntri rangbah u la ong ba ka thong ka party ka long ban wanrah ïa ki kam pynroi hapoh kane ka constituency.
Ka Dr Mehtab kan hap ban ïakhun pyrshah ïa 5 ngut kiwei pat ki kyrtong ba kynthup ïa ka Sadhiarani M Sangma jong ka TMC kaba dei ka tnga jong u MLA barim ka Rangsakona u Zenith Sangma, nangta ïa u Jingjang M Marak ka Congress bad u paralok ba ïajan bad u MLA barim ka Gambegre bad ba mynta u la long u u MP ka Tura Saleng A Sangma, nangta ïa u state vice president ka BJP bad u MDC ka Tura u Bernard N Marak bad ki kyrtong shimet kiba kynthup ïa Sengkrabirth Marak bad Jerry A Sangma ha kane ka elekshon shiteng samoi ka ban long la 13 tarik u Naiwieng.
U Bah Dhar u la ong ba ka jingrung jong u kyrtong ka BJP kan ym ktah satia ïa ka seng NPP. “Phi ïohi ba manla ki party ki don ka hok ban pynïeng la ki jong ki kyrtong. Kam don jingma. Ka BJP kan ïakhun ha la ka jong, ka Congress ha la ka jong, ka TMC ha la ka jong bad kumjuh ruh ka NPP,” bynrap u Bah Dhar.
Shuh shuh u nongïalam ka NPP u la ong ba ka seng TMC ruh kam dei ka jingma ïa ka party da kaba bynrap, “Nga tharai ka kyrtong TMC ka long hapoh jong ka kyrtong jong ngi bad kane ka long katkum ka jinglum jingkheiñ ha kane ka jingïakhun.”
Halor ka jingkynnoh ka TMC pyrshah ïa ka NPP ba ka la pynkheiñ ïa ka model code of conduct (MCC), u Dhar u la ong aiba ka election commission kan shim ïa kane ka kam bad ban ïaid katkum ka aiñ.