Kane kam dei ka sien nyngkong ba ki lad pathai khubor na ri thor ki long pyrshah ïa ngi: Paul

Shillong, Jymmang 30: U Myntri ka tnat ki kam Jngohkai u Bah Paul Lyngdoh ha ka sngi Thohdieng u la pynrem jur ïa kawei na ki lad pathai khubor na ri thor ba ka la pynbudnam ïa ka Meghalaya kum ka ‘crime prone state’ bad ong ba ïa kane ka kam yn sa ïakren ha ka kyrdan kaba dei.
Kane ka la wan shi sngi hadien ba kawei na ki lad pathai khubor na ri thor ne national daily ka la pynithuh ne pynbudnam da kaba khot ïa ka Meghalaya kum ka “crime prone” haba pathai khubor shaphang ki arngut ki shi kurim na Madhya Pradesh kiba la jah rngai, katba ki dang don ha ka honeymoon ha Sohra, kaba dei ka thaiñ kaba pawnam bha ha ki kam jngohkai pyrthei.
“Kawei na ki national daily ka la khot bad ai kyrteng ïa ka Meghalaya kum ka crime prone state hynrei ngim sngewphylla namar ki national media, ba bun na ki, barabor ki don ïa kine ki jingleh shilliang pyrshah ïa kane ka thaiñ shatei lammihngi hynrei ngin rah ïa kane ka kam sha ka kyrdan kaba dei,” ong u Bah Lyngdoh sha ki lad pathai khubor.
“Hynnin ka sngi haba nga don ha kawei ka prokram ha kaba ngi la don ka parasailing contest ha kine ki 5 sngi ba la leit, baroh ki riew pawkhmat kiba la shim bynta ki dei na ki bynta bapher bapher jong ka ri bad ki la ong ba kim poi pyrkhat ba kane ka jylla kadei kaba don ka jingkitkhlieh bad kum kaba khuid bad ka jylla kaba suk ba saiñ kum ka Meghalaya. Kumta ka long shisha kaba ym poi pyrkhat hynrei sa shisien pat, kane ka pyni ïa ka jinglong leh shilliang kaba ki don pyrshah ïa ngi,” u la bynrap.
Ha kawei pat ka liang u Myntri ka tnat Food and Civil Supplies u Bah Comingone Ymbon ha ka sngi Thohdieng u la pynrem jur ïa kawei ka lad pathai khubor na ri thor ba ka la khot ïa ka Meghalaya kum ka crime prone hill state bad ha kajuh ka por u la pynthikna ba ka kynhun search and rescue operation teams (SRT) ka la pyrshang ïa kaba bha tam ban pynlait ïa ki shikurim na jylla Madhya Pradesh, kiba la jah rangai ha ka jingleit honeymoon sha Sohra.
Haba ong ba kane ka jingjia kadei kaba ym poi pyrkhat, u Bah Ymbon u la ong, “Ka sorkar ka la phah shi bun ki kynhun ban wad ïa kine ki shijur. Ngim tip, naba ka jingdon jong u slap uba jur ha kine ki 4 bad 5 sngi mynta bad ka kynhun jong ngi ka dang ïaibteng ban wad ïa ki.”
Haba kynthoh jur kylla ïa ka khubor ba la pynmih da kawei ka lad pathai khubor na ri thor (national dailies), u Myntri u la ong ban khot ïa ka Sohra kum ka crime prone hill kam dei ka jingmut kaba bha.
U la ong ba ka Sohra ka dei kawei na ki jaka ba bha tam na ka bynta ki nongshong shnong jong ka India ba kin leit jngoh bad ki nongshong shnong ka Sohra kin ym ban pdiang ïa ka jingpynbudnam ka national media ban pynpaw jubor ba ka jaka jong ki kadei kaba jur ki kam sniew ne kam runar (crime prone).
“Nga ruh ngam sngewtynnad ïa kane namar ngam pat ju ïohsngew ïa kano kano ka jingjia kam runar ha Sohra naba kadei ka jaka kaba shngaiñ, kaba shongsuk shongsaiñ bad ki briew ruh ki long kiba lui lui,” bynrap u Bah Ymbon.