Ka VPP ka ladep rah ïa ka mat Umïam Resort ha ïingdorbar Thaw aiñ, ym kumba batai ka Congress: VPP

Shillong, Ïaïong 21: Ka Voice of the People Party (VPP) ka la ïeng skhem ban kyntait ïa ki jingkynnoh ba la kynthoh da u nongïalam ka seng Congress u Bah Manuel Badwar, haba ïadei bad ka kam Umïam resort. Ha ka kyrwoh khubor ba la phah da u nongai ktien ka VPP u Dr. Londoner Murphy Sohtun u la ong ba baroh ka dei tang ka jingïalam bakla bad kaba ym sngew ïahab ban ai jingmut ba ki jingsngewkhia ba la pynpaw bad ba la rah da ka VPP bad ki paidbah ka Meghalaya ki dei ki jingpyrshang ban shim kabu ban ïoh burom ha ka saiñ pyrthei.
“Aiba ngin long kiba shai: kane ka mat kam dei kaba la shna hi shimiet shimiet. Ka VPP ka la dep ban pynpaw ïa kiba bun ki jingpyrshah kham ha shwa lyngba ki jingïakren bad ka sorkar bad ka la buh ruh ïa kane ka kam ha ka record da kaba kren ruh hapoh Assembly ha kaba ka sorkar kam kwah ban sam ïa ki jingtip lyngba ki jingïakren kiba tei. Kine ki jingleh ki pynphalang ïa ki jingïaibteng bad ki jingkitkhlieh jong ka party. Mynta pat ban pynïahab kyrdan ba kadei ka jingshim kabu ka long kaba ym ïahab, ka bym hok bad ka jingbatai na ka bor pyrkhat kaba la pulom,” kynthoh u Nongaiktien ka VPP.
U la ong ba ka VPP na ka por sha ka por ka pynneh ba ki kam pynroi kim dei ban wan ha ka jinglut jong ki jingkordor, ka sawdong sawkun bad ki kam ka imlang sahlang. “Haba pynpaw ki jingsngewkhia shaphang ki kam kiba lah ban ktah haba wanrah ne kyntiew ïa ki kam jngohkai kiba heh spah ha kum kine ki jaka kam dei ka jingleh ka kam kaba thok, kadei ka jingleh ba don ka jingkitkhlieh. Haba shah ïa kine ki jingsngewkhia kum ki jingpynheh ne ki jingshim kabu saiñ pyrthei ka pynhiardor ïa ka jingsngew jong ki paidbah babun,” bynrap ka seng VPP.
U la ong ba ha ka jaka ban pynïahab kyrdan bad ki jingkynnoh kiba tatdor, ka Congress ka dei ban khmih jylliew shwa ïa la ka jong ka kyrdan bad ban batai balei ka la pulom ban ïengskhem hadien ba ïa kane ka kam la dep ban wanrah nyngkong. Ki paidbah ki donkam ïa ka jingshai, kum ki jingshisha kiba shiteng.
“Ka VPP ka la pynpaw biang ba ka jingkhot ïa ka jingialang paidbah ka dei kaba la suhthied katkum ka riti synshar jong ka. Haba ki jaka treikam ki la pulom ban sngap ïa ki jingsngewkhia ki paidbah, ka long kaba kongsan na ka bynta ki nongshong shnong ban wanlang bad ban pynpaw ïa ki sur ba dei ban sngap da ka sorkar. Ka jingïakren ka long kaba kongsan, hynrei kadei ban long kaba don jingmut bad kaba ïar, kam dei ban don u pud ne kaba khim tang ha ki saw kynroh jong ka kamra ban ïasyllok kiba ym kynthup ïa ki jingshah ktah jong ki paidbah,” ong u Nongaiktien ka VPP.
U la bynrap da kaba ong, “Ngi kyntu ïa baroh ki paidbah, kynthup ïa ka sorkar bad ki seng liang pyrshah ban ithuh ba kane ka kam ka ïaid shalyndet jong u laiñ kiba kyrshan. Kadei shaphang ka jingïada ïa ka lawei jong ka Meghalaya. Ka roi ka par ka dei ban long da kaba pyrkhat, kaba ïaineh bad kaba ïasoh bad ki jingangnud jong ki nongshong shnong, ym dei ban shah ïalam da ka ïoh ka kot ne ki jingmyntoi kiba lyngkot ne ba shah pynbor na shabar.”