Shillong, Kyllalyngkot 5 : U Bah PT Sawkmie, MLA barim u pynpaw, ba da ka jingisynei jong U Blei, lada u jop kum u MDC ha kane ka ilekshon kaban wan, ka tulop jong u un ai sha kiba duk basuk ka Mawlai Konstitwensi.
U bah Sawkmie u pynpaw ïa kane haba sdang ïa ka jingïalap ïa ka ilekshon MDC jong u. Ka jingthep vote na ka bynta kane ka ilekshon MDC kan long ha ka 21 tarik u Rymphang, 2025.
U la pynpaw ba un buh kyrpang ïa kane ka tulop na ka bynta ki paidbah kiba duk kiba suk, kiba jynjar bad kiwei kiwei.
Un mang iïa kane ka tulop khnang ba ki paidbah ka Mawlai Konstitwensi kin shngaiñ, lada ki wan ïakynduh ïa u ha ka por ba ki shitom ki shipa, khnang ba kin ïoh ban pyntip sha u.
Ha kane ka sngi u bah Sawkmie u la ïaid ban pan ïa ka jingkyrshan na ki paidbah nong Mawlai na ka bynta kane ka ilekshon MDC.
Haba ia dei bad kane ka jingïalap u bah Sawkmie u la ïaid ha kylleng ki jaka ha Mawlai ban pan jingkyrshan na kiba shong dukan, ki driver taksi, driver auto, ki nongbylla, na ki nongsait jaiñ bad na ki paidbah ba bun balang jong ka konstitwensi.
Ha kane ka sngi la ïoh ruh ïa ka jingkren na ki longkmie bad longkpa, kiba kyrpad sngewrit ïa ki paidbah nong Mawlai ba kin kyrshan ïa i ha kane ka ilekshon MDC.
Ka ilekshon sha ka KHADC kan long ha ka 21 tarik bad ka jingniew vote kan long ha ka 24 tarik u Rymphang, 2025.
