Ka kam shongkha shongman ka dei ka kam kaba la kheiñ kyntang kat kum ka jingngeit jongu Khun Khasi naduh Hyndai Hynthai katkum ki khana tang jong ka Jaidbynriew bad ha shwa ban Pynhap ïa u Sawar dei por jong ka Shongkha-Shongman, ki Arliang Kur –Arliang Kha kida ïa thew – ïa woh bha khnang ba ka Tarajur kan ym lah shiliang bad khnang ban lait na ka Sang ka Ma.
Hynrei katba nang mih ki sngi bad ki por khamtam ha kane ka Juk kaba mynta kiba bun kila kheiñ Dew-Thala noh ïa kane ka kam kyntang bad ka kam Shongkha ha kine ki Sngi kiba mynta la I thik kum ka kam Khun Jakai namar ka la sting palat haduh katta katta bad dei kane ka dawbah lehse ba sa ioh ban shim kabu sa u Nongwei-Nongar, ba u ïohi ïaka jingtlot jong ka Jaidbynriew halor kane ka bynta kaba long ka shlem kaban Saiñdur ïa ka Jaidbynriew. Nalor kata ym dei ba beiñ ïa ki kynthei hynrei ki khun kynthei jong ka jaidbynriew ruh teng teng kim kheiñ kyntang shuh ïalade ban bat ïa ka jinglong tynrai ban pynkhlaiñ ïa ka jaidbynriew kumba long kiwei ki jaidbynriew riewlum ha kane ka thaiñ shatei lam mihngi namar kiba bun kiba la mih na la ïing ban leit pule shabar ki la ngop beit ha ka jingphon jingpah jong kiwei ki jaidbynriew.
Kadon ka jing ong “Ka Jingsniew kam ju wan nangno nangno, hynrei ka mih na ïing”. Kane ka long kaba shisha namar ka Jaidbynriew katba nangmih ki sngi bad ki por kala nang ring swai ring sdot ha kiba bun ki Liang, hynrei lada ngi la pyrshang ban wad ïa ka Daw Tynrai ngin shem ba kine kiei kiei baroh ki mih namar ka jing synjor palat jong ki Long ïing-Long sem kaba long ka Thymmei jong ka Jaidbynriew. Dei namar ka jingbym don ïa ki Aiñ kiba khlaiñ kaban Teh-Lakam halor kane ka bynta ki sa mih shibun ki kynrum kynram ha kine ki sngi kiba mynta lada ngi phai ha ka jingkynrei ki Khynnah Surok, ki kam Tuh kam Thiem, , ki kam sniew-kam smeh,ka jingpep skul ba shiteng por jong ki khynnah, ka shongkha khynnah, ka lad ïohkam ïoh jam, ka kamai ka kajih bad kane kala ktah ruh wat ïaka (INFLUX) jing wan rung kyrthep jong ki Mynder, namar haba u Mynder u wan ban ïuh kjat sha kane ka Ri kaba ieit jong ngi kaba long ka Ri jong ka Ngap bad ka Dud ula dep pule lypa ïa ka jinglong jong ka Jaitbynriew, long lehnohei kata ka Land Transfer Act bad kita ki Infiltration Check Gate ïa kaba ka Sorkar kala pyrkhing ban teh Lakam ïaka jing wan tuid kyrthep jong ki Mynder bad ka long Lehnohei ruh ka jingtrei shitom jong ki Seng Bhalang kiba ïaleh ban khynra mynder naka Por sha ka Por namar ba ka jing shah hiar Thma kaba jar jar jong ka Jaitbynriew ha kine ki sngi kiba mynta ka dei Lyngba ka Shongkha ka Shongman.
Kam myntoi ban shu ïa Kyreit ba ngi dei ka Jaidbynriew kaba Tip Briew-Tip Blei, kaba don ïa ka akor ka burom bad kumta te ter namar lada ïa kane ka kam Kyntang kaba long kum ka Shlem ban Saiñdur iala ka jong ka Thymmei bad ïaka Jaidbynriew hi baroh kawei la Kheiñ Dew-Thala noh haei shuh kata ka Iktiar jong ngi ngin ïeng.
Ka Sorkar Jylla ka la dei ban ïohi Jngai bad ban shimkhia ïa kane ka bynta khnang ban lah ban teh Lakam ïa kine kiei kiei baroh naka bynta ka Bha ka Miat jong ka Imlang ka Sahlang bad ka Jaitbynriew hi baroh kawei namar dei tang da ki Bor jong ka Aiñ kiba lah ban leh a kine kiei kiei baroh. Ka Meghalaya kala don ïa ka Compulsory of Marriage and Registration Act naduh ki snem bala leit noh hadien ba mynjur ka ïingdorbar Thaw Aiñ ïa ka Bill bala pynlong aiñ da u Lat ka Jylla.
