Shillong, Nailur 01: Ka lympung ïalehkai jong ka Don Bosco Inter School Basketball Tournament 2023 ba la pynïaid da ka St. Anthony’s Higher Secondary School kan sa jam sha kaba kut mynta ka Sngi Saitjaiñ ha St. Anthony’s Higher Secondary School Basketball Court.
Kin don haduh hynriew tylli ki jingïakhun ba la pynkhreh ban sdang naduh ka por 10 baje mynstep na ka bynta ki shiphew kynhun kiba la ïohrung sha ka final hala ki jong ki kyrdan shynrang bad kynthei.
Ka jingïakhun final kaba nyngkong kan long hapdeng ka Pine Mount Higher Secondary School pyrshah ïa ka St Mary’s Higher Secondary School ha ka thup kyrdan jong ka Under-14 Girls ha ka por 10 baje mynstep, nangta bud sa ka jingïakhun ka thup Under-14 shynrang ka ban ïakhun hapdeng ka St Anthony’s Higher Secondary School pyrshah ïa ka H.Elias Higher Secondary School ha ka por 11:15 mynstep.
Ynda ladep ka thup jong ki Under-14 kynthei bad shynrang, yn sa ïoh biang ban pyntyllun ïa ka final jong ka kyrdan Under-16, bad ka ban sdang nyngkong kan long jong ki kynthei, ha kaba ka St Paul’s Higher Secondary School kan ïakhun pyrshah ïa ka St. Mary’s Higher Secondary School, ha ka por 12 shiteng mynsngi. Katba ka thup shynrang kan sdang ha ka por 2 baje nohphaisngi, hapdeng ka St Anthony’s Higher Secondary School pyrshah ïa ka Sacred Heart Boys Higher Secondary School.
Nangta ka jingïakhun final ba khadduh shynrang bad kynthei kan dei na ka bynta ka kyrdan Under-19, na ki kynthei ka Shillong College kan aireng pyrshah ïa ka Loreto Convent ha ka por 3:15 ka nohphaisngi, nangta ka jingïalehkai kaba khadduh kan long jong ki shynrang, ha kaba ka Shillong College kan ïaknieh namlahduh pyrshah ïa ka St. Edmund’s Higher Secondary School ha ka por 4 shiteng jan miet.
