Nongstoiñ, Rymphang 26: Satang kumba katto katne sngi la jam sha u bnai Lber bad ka jingrang tyrkhong jong ka mariang bad ka jingshit kan sa khyrwit tyngeh bad dei ha u bnai Lber ba ki paitbah jong kawei pa kawei ka shnong ki mad ïa ka jingkyrduh um.
Ha u bnai Lber ki paitbah jong kawei pa kawei ka shnong ki mad ym tang ïa ka jingkyrduh um, hynrei man la u snem ki don ki nongshong shnong kiba duh noh ïa ki ïing ki sem bad ki jingdon jingem, namar ka jingbam duh jong ki thylliej ding na ka jingthang pathar jong ki riew shim kabu ïa ki khlaw ki btap bad ki lum. Nalor kata ha une u bnai ki um ha ki wah ki la rit haduh katta katta namar ki tyllong umpohliew ki la rngad lut.
Ha kine ki sngi lajan baroh ki paitbah nongshong shnong ki ud ki nam bad ki jynjar jingmut. namar ka jingkyrduh ha kaba wat tang ka umbam um dih ruh kim ïoh pahuh pahai shuh. Hynrei kaba lyngngoh ka long ba haba ki bnai kyrduh um ki la poi, ki paitbah ki kynnoh bad tim ïa ka sorkar ba kam lah ban pynbiang umbam umdih.
Ka jingkylli kaba mih ka long hato ka sorkar ka lah mo ban shna umï mano ba pynrngad khlem dei por ïa ki tyllong um kiba ka sorkar ka la ai skhim ban shna ïa ki dam bad pynpoi ïa ka umbam umdih sha ki shnong lyngba ki pipe line kiba la buh naduh ki dam pynlang um haduh ki shnong ki thaw wat lada ka jingngai ka long da ki phew kilomitar ruh.
Haba phai ha ka jingrngad ki tyllong um bam ym lah ban len ïa ka jingshisha ba da ki phew snem, ki paitbah jong palat phew tylli ki shnong kiba hap ha Mawthadraishan Block bad Nongstoiñ Block, ki ïoh pahuh ka um bam na ki tyllong um kiba la ring na ki wahduid kiba mih na ki lynter lum Mawthadraishan. Hynrei naduh u snem 2022 ka jingpom pathar ïa ki khlaw ha shilynter jong utei u lum na ka bynta ban thang rnga ka jingkyrduh um ka la sdang. Lada ka jingpom pathar ïa ki khlaw ha shilynter jong utei u lum kan dang bteng baroh ki tyllong um kin sa rngad lut.
Ym lah ruh ban len ba ki don palat phew tylli ki pung kiba heh bha ha baroh shilynter jong ki kliar lum Mawthadraishan kata naduh ka shnong Domkseh, Mawphanlur, Mawkyrtung, Lawdisai bad kiwei kiwei ki shnong. Hynrei lada ki paitbah ki dang bteng ban pom pathar ïa ki khlaw, ha kawei ka sngi kitei ki pung ki lah ban don um tang ha ka por lyiur, hynrei ha ki aïom tlang kin kylla tyrkhong kum ki khyndew shrah bad dei hangta ba ki longïing ki hap ba thied wat ïa ka um sait paiñkhana ruh.
