“Hato kum ki trai jylla ngi ñiewkor ïa ka kam ba ngi trei ne im ja?

U dak jingkylli (???) uba heh u long: Hato kum ki trai jylla ngi long ki briew kiba kumno ha ka jingñiewkor ïa kano kano ka kam kaba ngi trei ngi ktah ne im ja. Kane ka dei ka jingpynsngew ba ngi donkam ban puson haba ngi pule ia ka history ka jingïaid ka por namar kane ka dei ka jingkylli ban ïatei na bynta ka jingshngaiñ ka imlang sahlang jong ngi kum ka Jaidbynriew bad ki trai jylla.
Ngi sakhi ïa ka jinglynga bad jingïaksaid ki khun samla jong ngi ban ïada ïa ka jaidbynriew bad jylla na ka jingshah tyllup ha kiwei ki jaidbynriew heh paid na kiwei ki jaka. Kaei kaba ngi ïohi ka long ba katba ngi dang ïa ksaid ban ïada na ka jingshah tyllup ha kiwei ki jaidbynriew hynrei katta nang jyllei ka jingtuid kiwei ki jaidbynriew sha kine ki lum baieit bathiang jong ngi.
Kaei ka daw kaba pynlong ba i kumba ngi dang ngam pynban katba dang ïa ksaid. Napdeng kiba bun ki daw, lehse ngi lah ban ong ba kawei na ki daw ka jingïai tuid kiwei ki jaidbynriew sha kine ki lum baieit jong ngi ka dei ka jingkheiñ sting jong katto katne napdeng jong ngi, ba ngim ñiewkor satia ïa ka kam kaba ngi trei ne im ja ban minot thob manla ka sngi, katba kiwei pat ki jaidbynriew ki minot thob ban trei shitom ïa kano kano ka lad kamai kajih ba ki ïohlad namar ka jingkyrduh kam ha ki jaka ne shnong trai jong ki. Kane ka plie lad ba kin ïoh bat lut ïa baroh ki jingtreikam bad ngi sa ong pat ba ngi kyrduh kam.
Ngi ju ïohsngew ïa ka jingïakren na ka por sha ka por da kiba pyntrei ïa ki kam tei iïng tei sem bad kiwei kiwei ki jingtreikam ïa ka jingkheiñ sting ki katto katne ki nongtrei haba ai kam ïa ki. Kane ka jingbym tista ne ñiewkor ïa ki kam ba trei ha ka jingtreikam ba man la ka sngi ka ktah ïa ka jingïoh ban pyndep ïa ki jingtrei ha ka por kaba biang bad pynlong ïa kiwei ki Jaidbynriew ban ïoh phrung khlieh ha ki jingtreikam bapher bapher.
Kane keiñ ka dei ka jingdkoh bad ka dawbah ba sa jyllei ki briew na shabar ka jylla ban ïoh kam ïoh jam bad klun ïa bun ki lad kamai ha kine ki lum baieit jong ngi bad buh jingeh kylla pat ïa ki khun samla jong ngi kum ki trai jylla.
Lada ngi kwah ba ki briew na shabar kim dei ban ïoh kam ïoh jam ne rung khlieh ha kine ki lum baieit jong ngi, ngi dei ban kyndit bynriew ba ki briew jong ngi ki dei ban minot tista khlem da pep trei than da ki bun sngi ne taïew bad ñiewkor ïa ka kam ba ki trei ne im ja, khnang ba ki jingpyntrei ïa ki kam bapher bapher kin ïaid beit ïaid ryntih khlem thut satia.
Lada ngi hi iwei pa iwei ngi pyndep hok bad janai ïa kano kano ka kam ba ngi trei, ngim donkam ban da beh ïa kiwei ki Jaidbynriew na kine ki lum jong ngi, hynrei da lade hi kin phet haba kim ïoh kam ïoh jam ban im ja.
Ngi sngewkmen ba bun na ki briew jong ngi ki lah sngewthuh ïa kane ka bynta bad ñiewkor ban pyntyllun ha ka rukom kaba janai ïa kano kano ka kam ba ki trei, hynrei dang don sa katto katne ki bym pat sngewthuh pura halor kane ka bynta ban ñiewkor ïa ka kam ba ki trei la ka long kaba rit ne kaba heh.
Ka por ka la dei ba baroh na ngi, ngin kyndit bynriew halor kane ka bynta, namar ngi im ha kine ki sngi jong ka jingpur sted ki lad pathai khubor ban saphriang lyngba ka social media bad ktah kylla ïa ka jaidbynriew bad jylla lada ka sienjam ba ngi shim ban ïada ïa la ka jaidbynriew ha ka jingsngew jong ngi ka long kaba dei, hynrei kiwei pat kin pyrshang ban ïalam bakla da kumwei pyrshah ïa ka jaidbynriew jong ngi ryngkat ki jingkynnoh ba ngi isih ïa kiwei.
Ngi im ha ka juk shai bad ngi hap ban ïaid katkum ka jingkylla ka por.Kumta ban ïada ïa la ka Jaidbynriew bad jylla ka dei sa tang ka jingñiewkor, burom bad minot tista ka jong ngi iwei pa iwei ïa kano kano ka kam ba ngi trei da kaba pynduna ïa ka jingpep trei palat ne leh bym suidñiew ïa ki nongai kam khnang ba ki nongai kam kin shaniah ïa la ki briew la jong, lym kumta ngin nym poi shano shano hynrei ngin nang ïai ngam katba dang ïakhun ne ïaksaid ban ïada ïa ka imlang sahlang ka Jaidbynriew bad ka jylla.