Nongstoiñ, Rymphang 26: Ka jingpynsahteng jong ki kontraktor kiba pyntrei ïa ka surok naduh u snem 2021-22, shuwa ba ka Balang Presbyterian Nongkhlaw West Khasi Hills kan pdiang ïa ka Jingïaseng Samla KJP Synod sepngi ha u snem 2023, ka la pynbitar ïa ki paitbah nongshong shnong katei ka thaiñ, namar ki kontraktor kiba pyntrei ïa katei ka surok kaba hynriew kilomitar, kim shym la pyndep ha ka por kaba biang bad ki la shu ieh khongreng palat marshiteng kata kumba lai kimlomitar tam.
Halor kane, ki nongïalam jong ka FKJGP Lai Lyngdoh Unit mynta ka sngi ryngkat u bah George Kharbani Headman jong ka shnong Nonglwai II, lem bad katto katne ki rangbah ba la synran lang da ki nongïalam ka FKJGP West Khasi Hills, ki la hiar ban leit jurip ïa katei ka surok bad la lap ba ïa ka surok kaba na Nongkhlaw shaduh Nonglwai II, u kontraktor u ba pyntrei u dang pyndep ban siang rong tang kumba shi kilomitar, katba kaba ka bynta ba dang sah baroh ka dang dei kaba khohruh khohram bad kaba sniew bha.
U bah George Kharbani Headman jong ka shnong Nonglwai II haba ai jingkren ha ki lad pathai khubor, u la ong ba ha shuwa ban pyntrei ïa katei ka surok ka tnad PWD ka la kular ba kan bthah ïa ki kontraktor ba kin pyndep ha shuwa ban long ka jingïaseng samla KJP Synod Sepngi bad ki trai jaka ki la shah sngewbha ban tih ïa katei kia surok khlem dap hah siew ïa ka bai khyndew.
Kaba lyngngoh ka long ba mar shu kut ka jingïaseng Synod Samla, ki kontraktor ruh ki la shu sangeh ban iehnoh kumto haduh mynta ba kawei pat ka jingïaseng Synod Samla ka la kut ruh kim pat lah ban pyndep.
U la ong ba lada katei ka surok ka dei tang na ka bynta ka Jingïaseng Samla KJP Synod Sepngi, ka sorkar ka dei ban siew noh ïa ka bai khyndew sha baroh ki trai jaka.
Hynrei lada ka dei ka surok na ka bynta ka jingmyntoi jong ki paitbah nongshong shnong jong ka thaiñ, ka sorkar ka dei ban hukum ïa ki kontraktor ba kin pyndep noh kloi katba lah khnang ba ki paitbah kin ym ïakynduh jingeh ha ka leit ka wan. Ha kaba ïadei bad ka jingpynsahteng jong ki Kontraktor ban siang rong ïa katei ka surok, u bah Nistor Nongkseh president ka FKJGP Lai Lyngdoh area unit, u la ong ba hadien ba ki paitbah jong katei ka thaiñ ki la pynsngew sha ki nongïalam ka seng, na ka liang jong ki lyngba ka RTI ki la leit ban buh da ka jingthoh sha ka ophis jong u Executive Engineer bad hadien ba ki la ïoh ïa ka jubab ki la hiar ban leit jurip ban lap ïa ka jingshisha.
U la ong ruh ba ha ka jingleit jurip jong ki ryngkat ki rangbah shnong ki la lap ba ka jingpyntrei jong ki kontraktor ka dang long tang kumba shi pawa katba kaba ka bynta kaba kim pat pyndep ka dang kham bun.
Utei u nongïalam u la ong ruh ba na ka liang ka seng ka kyntu ïa ki kontraktor ba ki dei ban pyndep noh kloi kloi kat ba lah, namar ka jingbuh por jong ka sorkar ban pyndep ïa katei ka surok ka la palat.
Lada ki kontraktor kim lah ban pyndep ha ka por kaba biang, na ka liang ki nongïalam ka seng kin sa leit ban ïakynduh biang ïa u EE ka tnad PWD, ban kyntu ïa u ba u dei ban leh ïa kaba donkam na ka bynta ki kontraktor ki bym lah ban pyndep hok ïa ka jingtrei kat kum ka por ba la buh da ka sorkar.
