Ka Sorkar kam pat don jingthmu ban pynjari ïa ki kyndon ïada COVID : Dr. Ampareen

Khlad uba pang COVID-19 ha WGH

0

Shillong, ïaïong, 28: Hadien ka jingkhladnoh jong uwei u rangbah na ka jingïabit ïa ka jingpang COVID-19 ha West Garo Hills District, ka Myntri jong ka tnat ka Koit ka khiah, ka Dr. Mazel Ampareen Lyngdoh ha ka la pynthikna sha ki paidbah ba ka Sorkar Jylla kam pat don kano kano ka jingthmu ban pynjari ïa ki kyndon ba pyrkhing ban ïada na ka jingsaphriang jong u khñiang jingpang COVID-19.
Hynrei, ka Myntri ka la kyrpad ïa ki paidbah nongshong shnong jong ka jylla ba ki dei ban long kiba phikir ïa lade da kaba bud ryntih ïa ki kyndon ïada COVID-19 khnang ban khanglad ïa ka jingsaphriang jong une u khñiang jingpang.
U rangbah uba la khladnoh na ka jingpang COVID-19 u dei uba la 46 snem ka rta na ka shnong Rajabala, West Garo Hills. Ïa une u rangbah la pynkit sha Tura Holy Cross Hospital ha ka 22 tarik mynta u bnai hadien ba um lah satia ban ring mynsiem bha bad na ka jingjur shaba palat ka jingshit met.
Ka Myntri ka la pyntip ba u Myntri Rangbah ka Jylla u Conrad Kongkal Sangma un sa lum jingïalang halor kane ha ka Lah Sngi u Blei jong ka taiew ban wan ban ïakren ha kaba ïadei bad ka jingai dawai tika ïa ki paidbah ha ka jylla.
Shuh shuh ka Dr. Ampareen Lyngdoh ka la ïathuh sha ki lad pathai khubor ba ka tnat ka Koit ka Khiah ka la shim ïa ka snam na ka met jong uba la khladnoh na ka bynta ban leh tes, ha kaba la pynshisha ba ka jingkhladnoh jong une u rangbah ka dei na ka daw jong u khñiang jingpang
Ka la kyntu ïa ki paidbah ba kim dei satia ban khuslai jingmut, hynrei ki dei ban bud ïa ki kyndon ban ïada na ka jingïabit ïa u khñiang jingpang bad ban leit mar mar sha ki jaka ai jingsumar lada ki don ïa kino kino ki dak ki shin ba ki suba ba ki ïoh ïa kane ka jingpang.
Ha kaba ïadei bad kane, ka Myntri ka la kyntu ïa kito ki briew kiba dang wan phai na ki bynta bapher bapher jong ka ri ba ki dei ban deng ïa ka Mask la kumno kumno haduh 7 sngi lada ki sngew halade ba ki don ïa ki dak ki shin ba ki ïabit ïa kane ka jingpang.
Ka la pyntip ruh sha ki paidbah ba ki jaka ai jingsumar ba la shna ha ka por ba ka khlam jingpang COVID-19 ka la wan lynshop ha kane ka jylla ki long kiba la pynkhreh lypa ban ai jingsumar ïa ki paidbah lada jia ba kane ka jingpang kan wan lynshop biang ha kane ka kynti.

Leave A Reply

Your email address will not be published.