Shillong, Iaiong 26 : Kan long ka sngi sah jing kynmaw ïa ka RCLP School Mawlein bad kumjuh ruh ïa ka Shnong Mawlein hadien ba la lah ban plie ïa ka ïing skul ba thymmai jong ka R.C.L.P School Mawlein ha ka sngi Palei ka 16 tarik Iaiong 2026.
ïa katei ka jingtei ba thymmai la plie da U Bah Banteidor Lyngdoh MLA ka thaiñ ha ryngkat ka jing donlang U bah P. Sun Sub Inspector ka DSEO East Khasi Hills District, Rev. Fr. John Valan Parish Priest ka Mawkynrew Parish ha kajuh ka por u ba long u Secretary ka managing committee, Bah T.Pohshna, Chairman BDMC Mawkynrew Block bad kiwei kiwei lem ki kmie ki kpa ki khynnah school.
U Bah Banteidor Lyngdoh MLA ka Mawkynrew Constituency haba kren kum u kongsan u la pynpaw ka jingkmen ba khraw halor ka jinglah ban wanrah ïa ki scheme jingpynroi ha ka shnong ka thaw, ïa kane ka ïing skul jong ka RCLP school Mawlein hadien ba u la wan ban jngoh da la ki jong ki khmat ha ki snem bala dep, “Nga khlem lah shuh ban shu peit tang da ki khmat namar kata nga shu kyrpad ïa ki Nonghikai ban ïaishah bad ha kane ka sngi kan dei ka sngi sah jingkynmaw ba ngi la ïoh ban plie ïa ka kane ka ïing skul ba thymmai ka ba la biang la bit ka ba la mang 15 Lak tyngka lyngba ka SRWP & CMSDF” . Bad na kaliang u kongsan u la ban shuh shuh ai ïa ka jing ïatreilang naduh ka Managing Committee, ki Nonghikai, ki kmie ki kpa bad kumjuh ki khynnah school ban nang pynkiew ïa ka jingnang jingstad ha ka thaiñ baroh kawei.
La ïoh jingkren na u Nonghikai katei ka School Bah Dibelstar Wankhar, ha kaba u la ai khublei kyrpang ïa u MLA ba donburom namar naduh u snem 1992 ba u la sdang ha katei ka school u la pyrshang ka lad ka lynti ban ïoh pynbha ïa ka iing skul hynrei shu sahkut tang ha ka jingïakren khlem urlong, hynrei hadien ba u la leit kyrpad ïa u Banteidor Lyngdoh MLA da kaba pynsted u la wan jurip ïa ka skul bad kala urlong mynta kumba phi la ïohi ba la shna da ka ïing skul ba paka.
Kumjuh u la pynpaw ba mynta u snem 2026 ka jingdon ki khynnah school ka long haduh 222 ngut naduh Nursery haduh Class-V, ka jingdon ki nonghikai ka long tang ar ngut ba la kyrshan na ka sorkar namar kata ki shem jingeh bha ha ka jingbun ki khynnah, u la kyrpad ïa u MLA, DSEO bad pynïoh kham bun ki nonghikai, bad kumjuh ruh ïa ka additional class room.
Kumjuh ruh la ïoh jingkren na u Sub Inspector DESO East Khasi Hills, Rev. Fr. John Velan, Bah T. Pohshna Chairman MDMC Mawkynrew C & RD Block, ryngkat ki jingshad jingrwai na ki khynnah skul ha katei ka sngi.
