Shillong, Ïaiong 27: Ka projek MegLIFE kaba hap hapoh ka Meghalaya Basin Development Authority (MBDA) ka la ïasoi ïa ka jingiateh kular lane ka Memorandum of Understanding (MoU) bad ka Meghalaya Rural Bank ban pynkhlaiñ ïa ka jingkyntiew ïa ka kamai kajih lyngba ka jingpynbha ïa ka lad ban ioh ïa ki lad jingiarap ha ka liang ka pisa tyngka.
Ka soskular, bala ïasoi ha Ophis ka MegLIFE, ka thmu ban pynsuk ïa ka jingpynioh ram na ka bynta ki Integrated Village Cooperative Society (IVCS) hapoh ka project, ka ban pynlah ïa ki nongshongshnong ha ki jaka nongkyndong ba kin ioh ïa ki jingkyrshan na ki Bank ha ki kam ban kyntiew ïa ka kamai ka kajih.
Ïa ka MoU la ïasoi hapdeng u Gavade Sachin Shankar, Executive Director ka MBDA bad Additional Project Director ka MegLIFE, lem bad u Ashish Yadav, Chairman of Meghalaya Rural Bank, ha ka jingiadon lang ki Ophisar na baroh arliang mamla.
Ki Heh Ophisar ki pyntip ba kane ka jingiatreilang la khmih lynti ba kan iarap ha ka jingdon pisa ban pyntrei ïa ki project bapher bapher ki ban kyrshan ïa ka kamai jakpoh kaba bteng, lyngba ka jingpynioh ïa ka ram da ka lynti kaba suk bad ka jingshakri jong ka Bank.
