Ka sngi burom ka Divine Mercy ha Divine Merry Retreat Centre Ladrymbai

Jowai, Ïaïong 18: U Director ka Divine Mercy Centre Ladrymbai Good Shepherd Parish Rev. Fr. Anthony Kolencherry ha ka jingpyllait khubor hynne ka sngi ha Jowai la ong ba ha kane ka 23 tarik mynta u bnai, ka Divine Mercy kan pynlong ïa ka sngi burom jong ka ha Ladrymbai Divine Mercy Centre ka ban sdang naduh ka por khyndai shiteng mynstep.
La ong ruh ba ha kane ka sngi yn don ki jingduwai pynkoit pynkhiah ia kiba pang kiba shitom ha ki jait jingpang ki bapher bapher da ki Lyngdohsohblei kiba long ki Shakri jong u Blei.
Ha kane ka sngi ha shwa ban sdang ia ki jingduwai na ka bynta kiba pang kiba shitom yn don ka jingknia Mass Iukharist ka ban lamkhmat da u Rev. Fr. Ferdinand Dkhar Diocesan Administrator ka Jylla ñiam Jowai (Jowai Diocese) ha ryngkat bad ki Lyngdohsohblei (Phadar) kiba wan na ki Parish bapher bapher jong ka Jylla ñiam Jowai.
U Director jong ka Divine Mercy Retreat Centre Rev. Fr. Anthony Kolencherry u kyntu ïa baroh bad ïa kiba pang kiba shitom ban ïa wan sha kane ka sngi burom jong ka Divine Mercy bad u ngeit skhem ba da ka jingisynei jong u Blei ba kito kiba pang kiba shitom kiba wan sha kane ka sngi burom kin ïoh ïa ka jingkoit jingkhiah met bad mynsiem.
Ha ka juh kane ka sngi (23/04/2023) u Bah F. Kharbina Rangbah Balang ka Balang shnong Tyrshang Ummulong Parish ha ka jingpyllait khubor u la ong ba ka Parish Ummulong jong ka shnat ñiam ka Jylla ñiam Jowai kan pynlong ïa kane ka sngi burom jong ka jingisynei jingblei ha ka Balang shnong Tyrshang bad la khot la wer ïa baroh ban ïawan sha kane ka sngi burom jong ka jingisynei (jingisnei) jingblei ka ban sdang naduh ka por 9.30 AM bad kut haduh ka por 4.00 PM. U bah Kharbina u ong ruh ba ha ka jingshisha ïa kane ka sngi burom jong ka jingisynei jingblei la dei ban pynlong ha kane ka 16 tarik hynrei na ka daw ka jingpynkyntang Bishop ïa u Fr. Wibert Marwein ha Nongstoin la rah ïa ka sha kane ka 23 tarik mynta u bnai.