Ka por ka la dei ba ki paidbah ka thaiñ Muliang kin ïa tylli ha ka HSPDP: Bah J.T.S.Thongni

Nongstoiñ, Rymphang, 24: Ha ka jingïalap elekshon hynne ka sngi ha ïew Langpih ka jaka ba mih jingkajia man ka por ha khappud Assam, ki la don saw tylli ki party kiba la wan ban pynshai paitbah ïa ki mat ïaleh elekshon jong ki kata ka NPP, Congress, BJP bad HSPDP.
Ka NPP ka dei ka party kaba la sdang nynkong ban pynshai paitbah, hynrei wat la u bah Kimfa Marbañiang um shym la wan dalade hynrei u bah World Champion Paliar u la wan ban mihkhmat ban pynshai halor ki nongrim jong ka. Hadien ba ka NPP ka la pynkut ka BJP ka la sdang ha kaba u bah Spastarlin Nongrem u la shim ïa ka bynta ban pynshai paitbah.
U bah Nongrem haba pynshai ha katei ka sngi, u la ong ba kum u khun shnong khun thaw jong ka Mawïamsyiem kawei na ki shnong kiba la shah thombor la bunsien ha ka sorkar Assam, kaba don ruh ïa ki nongshong shnong kiba la shah pynduh ïa ki EPIC jong ki, u sngewkhia haduh katta katta bad u la ong ruh ba ha ka por ba ki pulit Assam ki la wan thombor ha Mawïam-syiem de ma u ba la leit ban pynsangeh.
Na ka liang ka Congress pat u bah Godenstar Nonglong u ba dei u kyrtong haba ai jingpynshai ha katei ka sngi, u la ong ba ka jingmih madan jong u ban ïakhun ïa ka election ka dei namar ba u don ka jingsngewkhia halor ki jingeh ba ki paitbah ki ïakynduh.
U la ong ruh ba ki jingeh kaba kongsan mynta ka long ba ki paitbah ki la buaid poilitic sha ba palat kaba la ïalam bakla da ki nongïalam. U la ong ruh ba ka la don ka jingleh shilliang kaba jur haduh katta katta da ki nongmihkhmat ïa ki paitbah ba lada kim dei ki nongkyrshan jong u kim ju ïoh jingïarap.
Na ka liang ka HSPDP u bah J.T.S.Thongni MDC barim jong ka congress na Rambrai Jyrngam u la kiew rynsan lang ban ai ka jingkyrshan ba pura ïa u bah K.P.Pangñiang u kyrtong ka HSPDP. U bah Thongni haba ai jingkren ha katei ka sngi u la ong ba ka jingrung jong u sha ka Congress ha ki snem ba mynshuwa, ka dei tang ka jingbakla namar u la shah pynngop ha ki ktien jali ja um kiba thiang jong ka Congress, phewse ha kaba khatduh u la shet kylla pynban da khongpong. U la ong ruh ba wat la u la shah shet kylla hynrei ha u 2018 u la kyrshan bor bah ïa u bah Kimfa bad u la jop don burom. Hynrei ha kaba khatduh u la shet kylla bad mih noh shisyndon na ka Congress.
U bah Thongni u la ong ba hadien ba u la pyrkhat bad puson bha kum u rangbah, u la shim ïa ka rai ba u hap ban wad ïa u paralok u ba la ïa im lang ïa san bad ïaleit skul lang naduh dang khynnah, la u pdiang ne em ban ïalong paralok biang sa shisien bad uta u paralok ba jan tam jong u, u dei u bah K.P.Pangniang president ka HSPDP, ha kaba u la pdiang da kaba kmen ban ïalong paralok biang sa shisien bad kane ka lah ban dei ruh ka jingïalong lok haduh ba kut.
Nalor kata u la ong ba ka por ka la dei ba ki paitbah ka thaiñ Muliang bad ka Rambrai Jyrngam constituency kin ïatylli kawei, ban pynjop ïa u bah K.P.Pangñiang namar lada ki bakla ban jied nongmihkhmat ha kane ka kynti kan ym myntoi shuh lada ki babe pat hadien.
U la ong ruh ba ka por ka la dei ba ki ar ngut ki rangkynih na ka dong Muliang kata u bah J.T.S.Thongni na Kyrdum bad u bah K.P.Pangñiang na Tynghor, ba kin shim ïa ka lyngkor kaba khia ban ïa kit lang na ka bynta u paitbah ka Rambrai Jyrngam constituency bad jong ka ri Khasi Jaiñtia baroh kawei.