Ka Parliamentary Standing Committee on Railways ka dei ban ai jubab sha ka sorkar pdeng halor ka ILP

Shillong, Jymmang 15 : Ka Parliamentary Standing Committee on Railways kaba la wan tohkit bad jurip dang shen sha ka jylla Meghalaya halor ka lynti rel hapoh ka jylla khamtam ïa ka Tetelia-Byrnihat kaba sahteng haduh mynta ka dei ban ai jingtip bad jubab sha ka sorkar pdeng ba ka daw bah ba kane ka kam ka sahteng ka dei namar ba ki seng bhalang, ki paidbah bad wat ki nongmihkhmat paidbah ruh kim mynjur ban sdang namar ba ka sorkar pdeng hi kam pat ai ïa ka Inner Line Permit (ILP), kaba la dawa da ka jylla Meghalaya naduh u snem 2019 lyngba ka Resolution ba la mynjur hapoh ka ïing dorbar thawaiñ Assembly jongka jylla, ong u MLA jongka Mawlai Constituency ubah Process T Sawkmie.
Haba ïakren bad u nongthoh khubor u bah Sawkmie u la ong “ Ha kane ka jingwan jongkane ka Parliamentary Standing Committee on Railways (PSCR) ki la ïa kynduh ïa ki heh sorkar jylla bad ki la tip shai ka daw jong ka jingsahteng jong kane ka lynti rel kit mar na Tetelia shaduh Byrnihat kaba jngai 21.50 km kata 19.25 km ka dei ha Assam bad tang 2.25 km ha Meghalaya ka dei na ka daw ba ym pat don ka stieh ban ïada ïa ka jaidbynriew bad kata ka dei ka ILP. Naduh ki Seng Bhalang haduh ki paid nongshong shnong bad wat ki nongmihkhmat paidbah ruh ki sngewthuh ïa ka jingdonkam kane ka lynti rel bad lada ka sorkar pdeng ka ai ïa ka ILP ngi kloi ban mynjur ban shna ïa kane ka lynti rel namar ka la don ka stieh ban ïada ïa ka jaidbynriew na ka jingshah tyllep ha kiwei ki jaidbynriew. Hynrei namar ba ka sorkar pdeng ruh ka leh bym suidñiew bad leh bym patiaw halor ka Resolution ba la mynjur hapoh ka Assembly halor ka ILP kumta kane ka lynti rel ruh ka sahteng ne sahkut khlem lah ban pyndep tei ïa ka” ong u bah Sawkmie.
Kane PSCR ka dei kawei na ki Committee kaba heh bha jongka Parliament namar ka kynthup haduh 31 ngut ki dkhot kiba dei ki MP jongka Lok Sabha bad Rajya Sabha. 21 ngut ki MP ka Lok Sabha bad 10 ngut ki MP ka Rajya Sabha. Ka long ka Committee kaba donbor bha bad ka dei kane ka Committee mynta kaba dei ban ai jingtip sha ka sorkar pdeng ba ka daw bah ka jingsahteng ka lynti rel haduh Byrnihat ka dei namar ba ka sorkar pdeng kam ai ïa ka ILP.
U bah Sawkmie u la ong “ Lada ka sorkar pdeng ka kloi ban ai ILP ïa ka Manipur balei kan eh ba kan ai ïa ka jylla Meghalaya ruh. Naduh ki paidbah, ki seng bhalang bad ma ngi ki nongmihkhmat paidbah sngi sngewthuh ba ka jingwan ka lynti rel kan buh ïa ki trai ri trai muluk ha ka jingma namar khlem pep kin bun ki ban rung beaiñ sha ka jylla. Kumta dei tang ka ILP ka ban long ka stieh ban ïada ïa kane ka jingma jongka jaidbynriew”.
Lah ban pynkynmaw ba dang shen ha ka jingïakren bad u Symbud Myntri Rangbah ka jylla u bah Prestone Tynsong u la ong ka sorkar ka kloi ban buh da ka khyrdop talasi mynder ha station rel, hynrei ki seng bhalang kim mynjur ïa kane namar ki kwah beit da ka ILP. Nalor kata u Symbud Myntri Rangbah ula ïathuh ba la pynkhamti ha ki bor synshar district ban ïakren bad ïamir jingmut bad ki seng bhalang hynrei ki seng bhalang hi baroh ki ïeng beit ha ka nongrim ba dei ban ïoh shwa ïa ka ILP bad hadien kata kin sa shah ban shna ïa kane ka lynti rel ban shu kit mar ban poi haduh Byrnihat.