Imphal, Rymphang 20:U National President ka National Peoples Party (NPP) bad Myntri Rangbah ka Jylla Conrad Kongkal Sangma hynne ka sngi U Blei ula ong ba ka NPP kan ïakhun pyrshah ïa baroh ki kyrtong ka BJP bad kan jop bun eh ki seat ban long ka nongïalam ïa ka Sorkar thymmai ha Manipur.
U Conrad ula kop ïa kane ha ka jingïalap elekshon ban pan jingkyrshan ïa ki kyrtong ka NPP ha ka elekshon MLA jong ka Jylla Manipur ka ban long ha ki ar bynta kata ha ka 28 tarik Rymphang bad 5 tarik Lber.
“Kane ka Elekshon ba mynta ka dei kaba pher bha na ki elekshon bala dep namar ki paidbah ka Manipur kila ngiah lut ïa baroh ki National Party” ong u Conrad haba bynrap “Ta ka daw ki paidbah ka Manipur kila phaikhmat mynta sha ka NPP ba kan ïoh khur bun eh ka jingjop, ban thaw ïa ka Sorkar bad ban ïalam ïa ka Jylla Manipur. Kane kan sa urlong shisha ha kane ka kynti ba mynta”.
U Conrad ula ong ba ula leit iuhkjat ha kiba bun ki Constituency jong ka Manipur hynrei um pat ju ïohi satia ïa ka jingiamih jong ki briew ba kot da ki hajar. U ïathuh ba u kyrtong ka Andro Constituency L Sanjoy Singh ula pyntip ba ïa kane ka jingïalang la shu pynbeit ha ka por kaba lyngdoh naba ka jingïalang kaba heh kan long ha ka sngi nyng kong.
“Hynrei wat ha ka por ba lyngkot, peit ïa ka jingwan ki paidbah hangne..kane ka pyni ïa ka jingieid bad ka jing kyrshan ïa u (Sanjoy) kaban pynthikna ba un sa jop ha kane ka elekshon” ula pynpaw.
Haba pyntip halor ka jingleit jong u sha Hospital ban khmih ïa u Kpa u Sanjoy uba la shah sumar na ka jingshah siat ha ka jingïalap elekshon ha ka sngi sngi thohdieng, une u Nongïalam ka NPP ula ong “Nga la ïathuh ha u ba ki paidbah ka Andro Constituency ki iadon ha syndah bad u. Kam pher haduh katno ki liang pyrshah ki pyntieng pyn smiej hynrei ki paidbah kim dei ban sheptieng..Ngin ïakhun ïa ka BJP bad ngin ïakhun ïa ki kyrtong jong ki”.
Haba ban jur ba ka NPP kan ïoh khur bun eh ka jingjop ha Manipur, u Conrad ula ong ba ka daw balei ba ki paid bah kila sdang ban pdiang ïa ka NPP bad ka daw ka long ba ka party ka don ïa u thied ha ka Jylla Manipur bad ha ka thaiñ Shatei Lam Mihngi.
“Ka dei tang ka NPP na ki party ha ka Ri kaba la kha ha ka thaiñ Shatei Lam Mihngi bad bad la thaw ha ka thaiñ bad ka ïakhun ruh mynta na ka bynta ka thaiñ. Kane ka dei ka daw balei ba ki paidbah ka thaiñ bad ka Manipur kila sdang ban pdiang ïa ka party jong ngi bad dei ruh kane ka daw ba ka party kala sdang ban nang heh nang san ha ka thaiñ bad ha Manipur” ula ong.
Haba pynpaw ba ka NPP ka dei ka party kaba don ka jingngeit ha ki samla, u Conrad ula ong “Ngi dei ka party kaba ngeit ba ki samla jong ka thaiñ Shatei Lam Mihngi ki lah ban tyngshaiñ ha manla ki kam kiba kiwei kiwei ki ju lam khmat”.