Ka NPP kan ai ka jingshakri ba bha tam ïa ki paid ka thaiñ NE: Conrad
Nangkiew ka jingkhlaiñ ka NPP ha Manipur
Shillong, Jylliew 29: Ka National People’s Party (NPP) ka nang pynkhlaiñ shuh shuh ïa ka jingdon jongka ha Manipur, hadien ba katto katne ngut ki nongïalam saiñ pyrthei kiba ih bha haka kam saiñ hima ki la pynïasoh ïalade bad ka NPP ha ka prokram kaba la long ha nongbah Kohima ka Jylla Nagaland.
ïa kine ki dkhot ba thymmai la pdiang sngewbha da u President ka NPP uba dei ruh u Myntri Rangbah ka Jylla Meghalaya u Conrad K Sangma, uba la batai ïa kane kum ka por kaba sngew sarong kaba pyni ïa ka jingnang roi jong ka NPP ha ka thaiñ shatei lammihngi (North East).
U Conrad u la pynkynmaw ïa ka jingïaid lynti jong ka Party naduh ba la pynkylla dur ïa ka ha u snem 2012, da u kpa bad nongseng jong NPP u (L) P.A. Sangma, u la shimti ïa ka kam kum u National President jong ka Party.
U la kubur ïa ki jingeh kiba bun ba ïa kynduh ha ka ban tei ïa ka NPP naduh tynrai ha ka thaiñ shatei lammihngi, hynrei u la ai burom ïa ka jingjop ha ka jingshaniah, ka jingaiti, bad ka rukom treikam kaba pyrkhat jylliew ïa ki mat jong ka thaiñ Shathei Lammihngi.
Related Posts
“Ka jingthaw ïa ka party kam dei ka kam kaba suk. Ka long ka jingïaid lynti ka ban mad ïa kiba bun ki jingtynjuh , khamtam namar ba ki don shibun kiei kiei ha ka saiñ pyrthei haka thaiñ kiba ngim lah ban iehnoh. Hynrei lyngba ka jingïaishah bad ka jingtrei shitom, ngi la lah ban pynher ïa ka lama ha jrong bad ban buh ïa ka dak ha ka saiñ pyrthei jong ka ri” la ong u Conrad.
U Conrad u la kdew ba ka NPP ka dei tang ma ka ka seng riewlum kaba la kha bad tei pura da ki paidbah ka thaiñ shatei lammihngi, khlem ka jingdon bynta lang kiba na nabar ka thaiñ Shathei Lammihngi.
“ïa ka NPP la kha ha ka thaiñ shatei lammihngi, kaba la tei da ki paidbah ka thaiñ shatei lammihngi, khlem kano kano ka jingdon bynta lang kiba na nabar ka thaiñ Shathei Lammihngi. Mynta ka sngi, da ka jingsngew sarong ngi ïeng kum ka party kaba tang ma ka na ka thaiñ kaba don ïa ka kyrdan national party. Kata ka dei ka kam kaba khraw” u la ong.
Ka jingpynrung ïa ki nongïalam thymmai na Manipur la khmih lynti ba kan nang pynskhem shuh shuh ïa ka nongrim bad ka jingïatylli jong ka Party ha kylleng ka thaiñ.
Ha kane ka jingïalang, u Conrad u la ai khublei ruh ïa ka Ane-ü Khaming halor ka jingshah thung kum ka National President ba thymmai jong ka National People’s Women’s Front (NPWF).