Ka NPP ka la sei ïa ka kyrtong ba kynsai tam na ka Shillong Parliamentary Constituency: Rakkam

Shillong, Kyllalyngkot 11: Ka National People’s Party (NPP) ka la jied ïa ka kyrtong kaba kynsai tam na ka Shillong Parliamentary Constituency, ong u Myntri ka Sorkar bad Nongïalam ka NPP u Rakkam A Sangma da kaba kynthoh artat “Ka Kong Ampareen bad ka Jaiñsem ha Parliament, katno kan long ka jingsarong ïa ka Shillong Parliamentary Constituency”.
Haba ïakren bad ki nongthoh khubor, u Rakkam ula pynskhem ba ka NPP ka la jied da ka kyrtong kaba kynsai tam bad ka kynthei kaba biang tam na ka bynta ka elekshon bad ula kyntu jur ïa ki paidbah ba ki dei ban nang ban pynshong nongrim ïano kin phah sha Delhi.
Ula kren ïa ka jinglong kyrpang jong ka Meghalaya ha kaba ïadei bad ka jingai jait sha ka kmie bad ka long kaba kongsan ban jied ïa ka longkmie ban mihkhmat ïa ka Shillong Parliamentary Constituency sha Delhi.
U Rakkam ula ong, ba ka por ka la biang bha ban phah da ka MP kynthei sha ka Parliament, khamtam haba la bhah 33 percent ïa ki seat na ka bynta ki kynthei lyngba ka Women Reservation Act.
Ula pynpaw ïa ka jingskhem jingmut ba ka Kong Ampareen kan jop ïa ka elekshon bad ym ïohi ba kan don kano kano ka daw ba ka NPP kan ym jop na Shillong bad Tura seat.
U Myntri Sorkar ula ong, ba ka Dr. Ampareen ka dei kaba biang tam bad ki nongshong shnong ka Shillong kin sngew sarong ban sakhi ba ka Dr. Ampareen kan phong da ka jaiñsem hapoh jong ka Parliament.
“Ki paidbah ka Shillong kin sa sngewsarong ban ïohi ba ka Dr. Ampareen kan kren hapoh Parliament ha kaba kan riam da ki riam tynrai” ula pynkut.