Shillong, K’Lyngkot 11 : Ka jingdon ki Hima kiba oh la ka jong ka dor da kaba kheiñ phut (sq/ft), kata ruh tang ban ai ïa ka dulir pynskhem jaka, ka la pynlong ïa ka KHNAM ban ujor syndon sha Chief Executive Member ka KHADC, Bah Pynïaid Sing Syiem hynne ka sngi Palei.
Haba kren bad ki lad pathai khubor u Working President ka KHNAM, Bah Thomas Passah u la ong ba katkum ka jingaibor Ka section ba 6(8) bad section 7(2) jong ka “The Khasi
Hills Autonomous District (Regulation and Administration of Land) Act, 2021” ka Executive Committee ka la pynmih ïa ka notification kaba ai bor ïa u Syiem bad ka Hima ban shim da ka dor na ka bynta ban ai ïa ki dulir pynskhem, ki pata bad kiwei kiwei ki kot ki sla kot khyndew.
La ïathuh ba ki la ïoh jingtip ba na ka liang ka Council ka la buh da ka dor ïa ki ban shim na ka bynta ban rejistar ïa ka jaka. Kata na ka bynta ki jaka ba hapoh 5000 sqft ka long 2,000 tyngka, kiba heh naduh 5000 sqft haduh 10,000 sqft ka long 3,500 tyngka, jaka ba 10,000 sqft haduh 20,000 sqft ka long 7,000 tyngka bad kiba 20,000 sqft haduh 1 akar ka long 10,000 tyngka. Shuh shuh la ong ba ki jaka ba heh 1 akar haduh 10 akar ka long 20,000 tyngka bad kiba heh 10akar shaneng ka long 40,000 tyngka.
“Tangba ngi la ïoh ïa ka jingujor na ki katto katne ki riew-paidbah ba don ki Hima ki bym bud ïa kine ki jingbthah jong ka Council katkum ka aiñ hynrei ki la buh beit la ka jong ka dor, kata da kaba shu khein phut beit (sq/ft). Kumta ngi kyntu ïa ka KHADC ba kan pyntikna ba naduh ki Dorbar Shnong, ki Raid, ki Hima ba kin bud ryntih ïa kane ka aiñ khnang ba kan ym ktah than ïa ki paidbah,” ong u Bah Thomas.
Shuh shuh u ong ruh ba hadien ba ka Council ka la don la ka jong ka aiñ khyndew, ki Hima kim dei shuh ban rejistar hynrei ban shu pynskhem beit bad ruh ba kim dei shuh ban shim da ka dor kaba heh ban ai ïa ki dulir pynskhem. U ong ruh ba lada ki Hima ki leh kumne kan pynlong ïa ki paidbah ban ngiah noh bad kin sa bteng ban leit rejistar ïa ka jaka sha ophis u Deputy Commissioner kumba ju leh barabor.
“Na ka liang u CEM u la kular ban shimkhia ïa kane ka kam bad ban kren bad ki bor ba dei peit halor kine ki huri hura ba khyndiat. Ngi shim ruh ba kane ka jingïakren ka long kaba seisoh,” u la bynrap biang.
Shwa kane, u Bah Thomas u la ong ba ka jingud kaba bun na ki paidbah ka long beit ba ki Hima kim bud ïa ka jingbthah jong ka Council hynrei ki shim beit da ka dor heh kata da kaba kheiñ phut beit.
