Tura, Kyllalyngkot 21: Ka jylla Meghalaya kaba la ïaid lynti mynta 50 snem, kam pat bïang pura ha ka jingpynbïang ïa ki tïar ki tar ïalehkai, lait noh ha Shillong, bad katto katne ki madan lehkai football ha Tura kim pat long kita ki stadium kiba shongkun.
Ha kaba ïadei bad kane, na ka liang jong ka sorkar jylla hapoh ka jingïalam u Conrad K. Sangma kum u Myntri Rangbah, ka la trei shitom ban wanrah ïa kiba bun ki jingmyntoi sha ki jingïalehkai bapher bapher kum shibynta ban ai mynsiem bad kyntiew ïa ki samla ka Jylla ban dang ïai minot ban pynjanai ïalade ha ka kam ïalehkai.
Ka jingpynlong ïa ka Meghalaya Games ha Tura ka long ka kabu ba paka ïa ki samla shynrang bad kynthei ka jylla kiba ïashimbynta ha ki jingïalehkai bapher bapher ban pynpaw pyrthei ïa ka sap kaba ki don ha kaba ki lah ban shah jied ruh ban mihkhmat ïa ka Jylla sha ki lympung ba kham heh ne wat ha ki kyrdan ïalehkai na ka Ri, bad kane ka lah ban urlong satang lada ka Jylla ka lah ban pynbit pynbiang ïa ki jingdonkam ha ka liang ka Sports, kum ki coach kiba lah ban nang pynjanai shuh shuh ïa ka sap jong ki samla kiba la tyngshaiñ bha ha kane ka Meghalaya Games kaba dang shu kut hynnin ka Sngi Saitjaiñ.
Haba phaidien, ha kine ki sawtylli ki Meghalaya Games ba ladep, la pynlong ha ka nongbah Shillong, lah ban kdew ruh ba ka jingnang roi jong ka Sport ka la nang kiew bad ki tiar pyndonkam na bynta ki jingïalehkai bapher bapher ki la nang bit nang biang, hynrei watla kata ruh, ka dang donkam shuh ban nang pynbha bad donkam ruh ka jingïatreilang jong ki District kiba hapoh ka Jylla.
Haba ngi phai sha ka bynta ba 5 jong ka Meghalaya Games kaba la pynlong ha ka sien ba nyngkong ha Tura, ka long shisha ka lympung kaba heh, bad ki la don haduh 23 tylli ki jait jinglehkai Olympic bad palat 3000 ngut ki nongïalehkai kiba la wan ïashimbynta, katba ïa ka bynta ba saw jong ka Meghalaya Games kaba la long ha Shillong, ki la don tang 19 tylli ki jait jinglehkai bad kumba 2500 ngut kiba la poi ïashimbynta.
Ka jingrah ïa ka Meghalaya Games sha Tura ka la nang kyntiew ïa katei ka sor, ha kaba bun ki jingtei, kiba long na bynta ka Sports la ïoh ban pynïeng, kum ka Patogan Nengminsa Stadium kaba la plie paidbah shuwa ban sdang ïa katei ka tamasa lehkai Meghalaya Games.
Lah ban kdew ba shibun ki jinglehkai kum ka sïat khnam, ïakura bad jingmareh ki kham kiew bha ha ki khynnah lehkai na ri lum Khasi – Jaintïa namar ki la bïang ka jaka kilan met.
