Ka MDA II ka la ïoh ban leh bun ki kam ha kane ka jingdap 1 snem : Bah Paul Lyngdoh

Shillong, 06 Lber: U Myntri ka sorkar jylla bad u Nongaiktien ka sorkar MDA II u Bah Paul Lyngdoh u la ong ba ka sorkar jylla ha kine ki shisnem ba la leit ka la lah ban leh bun ki kam kiba kongsan kiba ym sngewlah ruh ban mut dur.
Haba ïakren bad ki lad pathai khubor uba Paul haba ong ba ladei ban ïoh ïa ka jingïaroh ïa kiba bun ki kam ba ïoh jingjop da ka sorkar jylla u la pynkynmaw ïa ka mang tyngka kaba la wanrah da u Myntri Rangbah ka jylla u Conrad Sangma ha ka dorbar mang tyngka kaba dang shudep.
Lah ban ong ba ka sorkar MDA-2 ha ka sngi Balang ka 6 tarik mynta u bnai ka la kynjoh shisnem ha ki jingshakri jong ka ïa ka jylla.
Haba ong ba ki jingtreikam jong ka sorkar MDA II ka la long kaei kaei kaba ym lah ban mut dur, u Bah Lyngdoh u la ong ba kumba la ïohi na ka mang tyngka kaba la wanrah da u Myntri Rangbah ka sorkar ka don ka jingpyrkhat ban trei ïa ka kam bad la khmih lynti ba ha shwa ban kut ka samoi treikam jong kane ka sorkar ka Meghalaya kan sa kynjoh sha ka ïoh ka kot kaba 10 Billion ne ka 10 Billion dollar economy.
Haba phai sha ka prokram CM elevate kaba la kiew bha, u Bah Paul u la ong, “Haba phai ïa ki kam kaba ïadei bad ka tnat Arts and Culture kaba la ju pyrkhat kum ka tnat kaba malu mala hynrei ka la lah ban buh ïa u durmot jong U Tirot Sing library ha Dhaka, kane Tagore cultural complex ha Shillong bad kiwei pat ki kam kum ka jingbuh mawnongrim ban pynbha shuh shuh ïa ka State Central Library kaba la ïaid shakhmat lyngba ka jingshimkhia u Myntri Rangbah.
U la ong, “Ka Tnat Tourism ka long kaba bun kam ha ki kam ba manla ka sngi naba ngi don ka MGMP kaba pynlong ïa ki prokram bad ka jingdonlang kumba 3000 ngut ki samla.”
“Ngi don kumba 1500O ngut ki briew kiba ïadei beit ne kiba treikam napoh haba ïadei bad ki bynta ka tourism,” u la bynrap. U la pynpaw da kaba ong, “Kine kidei ki kam ba heh kiba ka sorkar jylla ka la leh bad ïaid lyngba ha kine ki 1 snem ba la leit kiba dei shisha ban ïoh ki jingithuh.”
Haba kren shaphang kiba bun jait ki ram ba la shim da ka sorkar jylla u Bah Paul u la ong, “Ngin sa pynthikna ban pynkhuid ïa kine ki ram da kaba pynthikna ruh ba kadei ban don ka jingmih na kane ka jingshim ram”.
“Ha ka jingshisha haba ngi peit ïa ki projek kum kane ka jingbuh mawnongrim hangne ha Rilbong kadei tang lyngba ka sorkar MDA II, ba la ïoh ban ai bynta na ka jylla kaba la lah ban pynurlong ïa kane ka complex ban ïaid shakhmat,” u la bynrap.
U la ong ba ki paidbah kin sa ïohi shuh shuh nangne shakhmat ïa ki kam ba ka sorkar kan sa leh ha kine ki snem ban wan.