Shillong, Lber 6 : U Chief Electoral Officer ka jylla u BDR Tiwari ula ong, ba ka jylla Meghalaya ka la dep pynkhreh na ka bynta ban pynlong ïa ka Elekshon MP Lok Sabha 2024 bad mynta ka ap sa tang ïa ka Election Commission of India (ECI) ban pynbna ïa ka tarik ban long ka elekshon.
U BDR Tiwari ula kren ïa katei, ha ka sngi ba ar hadien ba ula dep lum ïa ka jingïalang bad ki Deputy Commissioner (DC) bad ki Superintendent of Police (SP) jong ki District bapher jong ka jylla Meghalaya, ha Conference Hall jong ka Secretariat, ha kaba ïadei bad ka jingpynkhreh ïa ka Elekshon MP Lok Sabha.
Ha ka jylla Meghalaya ïa ka elekshon MP Lok Sabha yn pynlong ha ki Ar tylli ki Constituency, ka Shillong bad Tura Parliamentary Constituency.
U CEO ula ïathuh ba ha katei ka jingïalang ki heh jong ka Election Commission of India, kila ïakren lyngba ka Vodeo Conferencing bad ki DC bad ki SP na ki district bapher na ka bynta ka jingpynkhreh ban pynlong ïa ka elekshon MP Lok Sabha 2024.
“Ka jingpynsngew jong ki heh ophisar ka sorkar, ka long kaba biang bha bad ka jylla Meghalaya mynta, kala long kaba la pynkhreh ban pynlong ïa ka Elekshon MP Lok Sabha” ong u Tiwari.
Ula ïathuh, ba kiba ki kam ki jam ki la ïaid bha shakhmat bad kumta la khmih lynti ba ka jingpynlong ïa ka elekshon kan long kaba ïaid beit ïaid ryntih bad la khmih lynti ba ki paidbah kin mih bun ban ïashimbynta ha ka elekshon.
U Tiwari ula ong, ba ki ophisar ki la ai ïa ki jingbatai kiba bniah ha ki heh jong ka ECI halor ka jingpynkhreh ïa ka elekshon bad halor ka jinglong jingman jong ka suk ka saiñ ha ka jylla bad na ka liang ka ECI kala dap da ka jingsngewtynnad halor ka jingpynkhreh baroh.
Ula ong ba ka Tnad Elekshon jong ka jylla myta ka ap sa tang ïa ka jingpynbna jong ka ECI ïa ka tarik ban pynlong ïa ka elekshon Lok Sabha.
