Bun ki samla bym pat ïoh EPIC, da ka ELC thaw ka tnat Election ha ki skul bad Kolej
Shillong, Lber, 6: Ka tnat elekshon bad ka tnat Pule Puthi ka Sorkar Jylla ha ka sngi Balang ki la ïasoi ïa ka soskular ïasngewthuh jingmut (Memorandum of Understanding) ban pyntreikam da ka Electoral Literacy Clubs (ELC) khnang ban pynrung kyrteng ïa ki samla pule kiba la kynjoh 18 snem ka rta ba kin ïoh ïa ka Electoral Photo Identity Card (EPIC) shwa ba ka ri India baroh kawei kan leit sha ka elekshon Lok Sabha ka ban sa long shen.
Ïa ka MoU ba la ïasoi da u Chief Electoral Officer (CEO) Jylla u Dr. BDR Tiwari bad u Director ka School Education and Literacy u Swapnil Tembe ka dei kaba la bthah da ka Election Commission of India (ECI) khnang ba ki samla kiba la kynjoh 18 snem ka rta ki dei ban ïoh ïa ka EPIC khnang ba kin ïoh ïa ka lad ban jied ïa ki nongmihkhmat sha ka Parliament.
“Ïa kine ki ELC yn sa buh ha ki jaka pule Higher Secondary School bad ha ki College. Ka jingthmu ban buh ïa ki ELC ka dei kaba la slem bad ki dang treikam haduh mynta hynrei ki don pat katto katne ki bym treikam,” ong u Tiwari ha ka jingïakren bad ki lad pathai khubor hadien ba ïasoi ïa ka MoU.
U ong ruh hadien ka jingbthah jong ka ECI la pynbha ïa ki katto katne ki kyndon jong ka MoU.
Shuh shuh u la ong ba ki nonghikai kin dei ki Nodal Officer jong ki ELC.
U Swapnil Tembe u la phah ïa u kyrwoh sha ki khynnah skul ïa ka jingangnud jong ka sorkar ban pynngewthuh ïa ka synshar paidbah.
“Ka khubor ka don ha ki lynnong kot bad ka dei ruh ka mat ba la kdew ha ka MoU,” u la ong.
“Ngi la thaw ïa ki Electoral Club mynba nga dang long u Deputy Commissioner saw snem kynthih bad nga dang kynmaw kyndiang haba ngi la thaw ïa ki ELC ha ki District Level. Mynta, hadien ka jingïasoi ïa ka MoU ngin pynthikna ban sa peitngor bha ïa ka jingtreikam jong ki ynda la thaw ha ki Secondary School,” u la bynrap. “Kawei ka mat ba kongsan kaba la kdew ha ka MoU ka long ba ki khynnah skul kiba la kynjoh 18 snem ka rta ki dei ban don ïa ka EPIC namarba nga kynmaw ba bun ki khynnah kiba la kynjoh 18 bad 19 snem ki dei ki bym pat don satia ïa ka EPIC,” la ong shuh shuh u Tembe.