Shillong, 06 Lber : U Myntri ka tnat Arts and Culture ka sorkar jylla u Paul Lyngdoh kum u Kongsan ha ryngkatlang bad u Chairman ka MTDC u Bah Sanbor Shullai u Symbud Kongsan ki la buh ïa u mawnongrim ban tei ïa ka Tagore Cultural Complex (TCC) ha Rilbong Shillong ka ban donlang ïa ka Museum bad kiwei.
Hadien ba la buh ïa u mawnongrim u Bah Paul Lyngdoh u la ong ba ka jingbuh mawnongrim ka long kum ka jingai sngewbha ka sorkar jylla ha ka jingdap ba shisnem jong ha ka sngi Balang.
Haba pynpaw ïa ki kam ba la leh da ka Tnat Arts and Culture u la ïathuh ruh ba ka sorkar ha shwa kane ka la ïoh ruh ban plie ïa u Mot Tirot Sing Syiem ha Dhaka.
Haba kre shaphang u Rabindranath Tagore haba ïadei bad ki jingshem phang bad ba u la thoh ïa ki 3 tylli ki poitri u Bah Paul u la ong ba watba ka Shillong kadei kaba rit bha ha ka jingheh, hynrei kala pynmih bun ki khraw pyrkhat bad kaba mynta ka la paw ha ka pyrthei.
U la ong ba kane kadei ka Sngi bakmen ban pynbna ïa kane ka project da ka jingthmu ban sdang tei noh ïa kane ka kam, bad hadien ba u la shimti ïa ka tnat u la ïoh ban pyllait ïa ka jingmang napoh ka state share kaba long T. 1.4 klur.
“Ngi Kyrmen ba ynda la dep kan long kaba paw ha ka pyrthei baroh kawei kum ka jingïakylliang ha ki riti dustur bad ka jingshem phang ban mih ki riewstad. Sngewbha pyni sha ka pyrthei ba ka Shillong ka la paw ha kiba bun ki liang,” u la ong.
Katba u Bah Sanbor Shullai uba dei u MLA ka thaiñ bad u Chairman ka MTDC u la pynkynmaw ba ha ka por ba u dang long u Myntri ka Arts and Culture ha u snem 2021 u la sdang ïa kane ka kam da ka jingleit ïakynduh ïa u Myntri ka Sorkar Pdeng uba khmih ïa kane ka tnat u G Kishan Reddy na ka liang jong u ula mang T. 13.13 klur na ka jinglut jong baroh kawei ka projek kaba long T. 14.48 klur. “Ïa kane ka kam nga la sdang naduh ba nga la long Myntri ka tnat ha ka 27 tarik u Naitung, 2021 nga la sdang ïa kane ka projek haduh ba ka la urlong mynta. Hadien ka jingwan jurip kaba bunsien ha ka 7 tarik u Risaw, 2022 la ïoh ka shithi ba la mang ka Sorkar Pdeng ïa kane ka projek bad ha u snem 2023 ka tnat ka ïohpdiang ïa ka jingmang kaba nyngkong,” ong u Bah Shullai.
