Shillong, Lber 06 : Ka nongshna ïa ki dawai umphniang mih shñiuh na Umseiñiong Marbaniang kaba don ha ka thaiñ Sadew, Kong Reality Syiem ha ka sngi Balang ka la ïathuh ba namar ka jingïaid iew ka dawai ba ka pynmih ka la pynlong ïa ki katto katne ki briew shim kabu da kaba die ïa ki dawai ba ki shna hi ha kyrteng ka dawai ba shna ma ka.
Haba kren bad ki lad pathai khubor, ka Kong Reality ka ïathuh ba ïa kane ka la tip da ka jingïathuh jong ki paidbah kiba thied ïa kitei ki dawai da ka jingngeit ba kadei ka dawai Marvelous oil ba pynmih ma ka.
“Don kiba ïoh ïa ka umphniang ha u bilor ba la weng ïa ka jingpyndait (seal) bad don pat kiba ïoh ïa ka dawai umphniang ha u bilor ba don tang shiteng ka dawai. Kumta, nga kyntu ba lada phi thied na shabar wat ym thied satia lada ym don shuh ka seal,” ka la ong.
Nalorkata, ka ong ruh ba ki don ki briew kiba shim kabu ban pynïaid iew ïa ki dawai umphniang da kaba kam ba kadei ka dawai ba pynmih ma ka.”Kiba die wat shim kabu bad kiba thied pat kim dei ban thied palat ïa ka dor,” ka la bynrap biang.
Ka Kong Reality ka la ong ruh ba ki la don palat 10,000 ngut kiba la hap shñiuh kiba wan ban shim dawai na ka bad ki don tang khyndiat ngut eh ne kumba 5 persen kiba pyntip ba kim mih.
Shuh shuh ka ïathuh ruh ba kiba wan shim ïa ka dawai jong ka ki wan naduh Delhi, Rajasthan bad na kiwei kiwei ki jylla.
