Khliehriat, Lber, 6: Hadien ka jingïoh jingtip kaba tikna halor ka jingdon ki briew kiba kit ïa u drok, ki Pulit ka ANTF East Jaiñtia Hills District ha ka sngi Baar ki la pynlong ïa ka jingpynap shrim ha surokbah National Highway ha Lumshnong bad ioh bat ïa kawei ka kali Maruti Suzuki Baleno kaba don u number AS-11-S-3488 ba la ñiah da u Ajamal Husen kaba dang wan na ki thaiñ Silchar, Assam. Ha ka jingkhynra ki Pulit ki la lap hynñiew tylli ki synduk thep sabon barit kiba la thep da u drok.
Hadien ba la dep tes la pynshisha ia u drok uba don ka jingkhia kaba 77 gram.
Ki Pulit ki la kem noh ïa u nongñiah ïa ka kali u Ajamal Husen bad la kurup noh ïa u drok, ïa ka kali, kawei ka mobile phone, ka EPIC, ka Driving License, Pancard bad Aadhar Card. La register case ruh ha Lumshnong Police Station bad la pynngat hapoh ki kyndon jong ka NDPS Act bad ka jingtohkit ka dang iaid shakhmat.
