Ka MDA dei ka BJP, lah ban ai jingkyrshan ïa ka FCRA ha ïingdorbar thaw-aiñ ka ri: Pala

By Mawphor Editor On Aug 11, 2026

Shillong, Nailar 10 : U President jongka Meghalaya Pradesh Congress Committee (MPCC) u ma Vincent H Pala mynta ka Lah Sngi U Blei u la kynnoh ba ka sorkar MDA hapoh ka jingïalam jongka National People’s Party (NPP) ka dei hi ka BJP bad kumta ka lah ban ai jingkyrshan ïa ka Bill jingpynkylla ïa ki kyndon ka Foreign Contribution Regulation Act ha Parliament.
Haba kren bad ki lad pathai khubor u la ong ba kan buh jingeh bha ïa ka NPP ha Lok Sabha halor kane ka Bill.
“Hapoh Iing Dorbar Thawaiñ Lok Sabha ka NPP ka don uwei u MP bad nga ngeit ba ka histori kan sa batai hi kaei kaba kin leh hapoh Parliament la kin kyrshan ïa ka FCRA ne ki pyrshah ïa ka” ong u ma Pala.
“ Nga sheptieng ïoh ki phet rieh noh ne kin ai ka jingkyrshan ïa ka FCRA namar ka MDA ka dei hi ka BJP kumta shaei keiñ kin leit” ong biang u ma Pala.
U ma Pala u la kynnoh ruh ïa ka sorkar pdeng ba ka wanrah ïa kane ka Bill ban ïoh nion beiñ ïa ki Niam ba rit khamtam ki Khristan bad ki Seng trei mon sngewbha.\
“ Tangba tang kawei ka Sorkar kan ym lah da lei lei ruh ban pynduh jait ïa ki Khristan ha India ki la pyrshang bad mynta da kane ka aiñ kin dang ïoh thombor ïa ki Khristan.” u la ong.
“ Ym dei tang ïa ki Khristan hynrei ïa kiwei kiwei ki niam bad ki jaidbynriew ruh lane wat ïa ki seng bhalang ruh kane ka dei ka lynti ban thombor bad knieh ïa ki jingdon jingem bad ki jaka puta jongki. Da ka jingwanrah ïa ka bill bad ki kyndon ha kata ka rukom ba nadong shadong yn pynïaid da ki bor sorkar bad kane ka dei ka jingthombor bad lute ïa ki niam rit ne ia ki seng trei mon sngewbha” ong u ma Pala.
U la maham ruh ba kane ka jingpynkylla kan ktah jur ïa ki tnad pule puthi ha ka jylla. “ ïa ki skul jongphi yn knieh noh, ïa ki hospital ruh yn knieh noh bad wat ïa ki ïing Mane ruh yn knieh noh” u la ong.
Na kata ka daw u la ong ba ka jingsynshar jongka BJP ha Delhi kam slem shuh ka la poi sha kaba kut. “Ka sorkar ka dang sah sa arsnem shiteng bad nga ngeit ba kan wan ka jingkylla kaba khraw” pynkut u ma Pala.