Ka Maw-Wanpnan ka jaka shongkai pyngngad ha ka shnong Nonglyngkien kaba don la ka khanatang

Mawkyrwat, Risaw, 21: Ka Maw-Wanpnan ka dei ka kyrteng kaba don nam haduh katta katta na ka bynta jong ka Kur Lyngdoh Nonglyngkien bad kumjuh ruh ïa ka shnong Nonglyngkien, ka Ri Khaiñ Lyngdoh Nonglyngkien bad wat haduh ka Hima Maharam ruh kumjuh, hynrei namar na ka jingbym don mano mano ki ba lah ban pynpawnam ïa ka bad ïa ka nam jong ka, ka long kumba la buhrieh noh shadien khlem don ba tip ïa ka. Mynta ka Kur Lyngdoh Nonglyngkien, da ka bor ka Dorbar Kur, ka la rai ban pynpawnam ïa kane ka jaka kaba long kawei na ki jaka ban pynsahnam ïa ka kyrteng jong ka Kmie bad u Kpa ba nyngkong jong ka Kur Lyngdoh Nonglyngkien, ka Meirad Wankitkhoh bad u Parad Pnan Mylliem.
La ïathuh khana pateng ba dei ha kane ka jaka ha Maw-Wanpnan ha kaba ka Meirad Wankitkhoh bad u Parad Pnan Mylliem ki la wan shong ïing ha kawei ka synrang ba la khot ka ‘Synrang Bah’ bad ki sa pynlong kper thung jingthung ha kane ka jaka bad ka sa ïoh ïa ka kyrteng ‘Maw-Wanpnan’. Kane ka jaka ka don hapoh ‘Law Ïing-blei tangba kam dei ka jaka lehniam kñia hynrei ka dei ka jaka kaba don nam namar ba ka don ka krem Synrang Bah kaba i donkam ba U Blei U la buh bad kaba long ban shong ïing na ka bynta ka Meirad Wankitkhoh bad u Parad Pnan Mylliem.
Ha kane ka jaka, ka don kawei ka maw kaba kyrteng ka ‘Mawshohsyoiñ’, ka maw kaba ka kur Lyngdoh Nonglyngkien ka la lap ïa ka ‘Jingtem Kyndoh’. Kane ka kper jong ka Meirad Wankitkhoh bad u Parad Pnan Mylliem ka don halor jong u mawsiang hynrei ka long pat kaba seisoh.
Shaphang mihngi na kane ka jaka, lah ban ïohi kyndiang ïa ka lhuh them kaba riat bah jong ka riat krem Mawriat, krem Kynda, twah (them) Jaraiñbar, madan Mawduh, pynthor kba Demthroiñ, ïa ka shnong Mawthong, ïa u Symper Nongsynrieh bad ka shnong Nongsynrieh. Kane ka jaka ka don markhap mihngi na ka jaka shna Ïing-blei ka Kur Lyngdoh Nonglyngkien. Dei hangne ha Maw-Wanpnan ba ki paidbah nongïashimbynta bad nongwanpeit ïa ka jinglehniamkñia jong ka Kur Lyngdoh Nonglyngkien, hashwa bad hadien ba la dep ïa ka jinglehniamkñia, ki pynlong ïa kane kum ka jaka shongpyngngad bad shongkai ban jahthait bad ban ïoh bam lyer pyngngad. Kane kam dei tang ka jaka shong pyngngad ha kane ka por lehniam kñia, hynrei haduh mynta ki nongshongshnong, ki samla samhoi, ki dang sngewtynnad ban wan shongkai ha kane ka jaka khamtam eh ha ki por ba la khielung u kba ha ki pynthor naduh u bnai Jylliew haduh u bnai Risaw ba u kba u la kylla rong ksiar kumjuh ruh ka long ka jaka ban ïa bam ïa ki soh kiba bunjait ba ïoh kheit na ka ‘Law Ïing-blei.
Kumba la kdew shakhmat, hangne ha Maw-Wanpnan, ka don kawei ka synrang ba la khot ka Synrang Bah. Kane ka Synrang Bah ka dei kawei ka synrang maw ne krem maw kaba bit ba biang bha ban shong ban sah briew kum ba 20 (arphew) ngut ei ei. Ïa kane ka synrang maw, la ïathuh ba U Blei U la pynkhreh na ka bynta ban shong ïing shong sem ka Meirad Wankitkhoh bad u Parad Pnan Mylliem kumba la bthah ka khan haba la lap ka miet ha Mawlong-khohsnoiñ. U Parad Pnan bad ka Meirad Wan ha ryngkat bad ki khun arngut kim lah shuh ban hiar ïa ka riatbah ba jrong bad kim iohi shuh ïa ka sla ladew ne sla diengkait ba ki bud namar ba la miet.
Ka jingïathuh khana pateng ka ong ba haba la khan la kyrpad ha U Blei U Trai Kynrad shano ba ki dei ban leit, ka khan ka la jubab ban hiar noh sha phang shatei sha kaba U Blei U la pynkhreh ïa ka jaka ban shong ban sah ïa ki. Ynda ki la hiar kumta, ki la lap shuwa ïa kata ka sla ladew ba ka don hajan kata ka krem bad ki la shim ïa kata bad kylli ha ka shano ba kin leit. Kata ka sla ladew ka la jubab ban sah noh hangta hapdeng ka miet ba ngiew bad ki krem hapoh ‘lawbah ba pah tang ki sim bad ki mrad khlaw ba sngewshyrkhei. Kumta ki la hap wad sawdong sawdong hangno ba kin thiah kin dem bad kumno ban bam ban dih. Hadien ba ki la ïa wad bad phai sawdong, ki la lap ïa ki kynroh maw bad ha kine ki kynroh maw ka don ka synrang krem kaba bha bad kaba biang ban shong ban sah miet noh hangta. Kane ka synrang krem maw ka don ar kamra, kawei ban thiah bad kawei ban shet ban tiew bad sa kawei ban shongkai kum ka phyllaw ïing.
La ïathuh ba dei ha kane ka jaka ba ki la ainguh ïa u Trai Kynrad U Nongbuh Nongthaw namar um ju la iehnoh ïa u briew haba la kut ki lad. Ki la ïashong ïing noh hangta katba U Trai Kynrad U dang shah ban shong ban sah. Watla ka long ha ki krem synrang maw, ka ‘lawbah ‘lawsan, hynrei ym don mrad kynsha kiba wan ban pynthud bad pynma ïa ki.
U Parad Pnan, tang shu shai byrngut, u la kyndit naba thiah bad u la ïohsngew ïa ka jingpah ki sim ki doh ha khlaw, kumta u la khie joit bad u la mih shabar na kata ka krem bad u la peit sawdong ïa kane ka jaka bad u la itynnad eh ïa kane ka krem bad ïa kane ka jaka. Haba u la ïaid sawdong sawdong, u la lap ruh ba ki don ruh bun ki sohkhlaw bad ki phan khlaw bad u la ngeit ba lada U Trai Kynrad U shah ban shong hangne, ki lah ban im slem namar ka jingdap kyrhai ki soh bad ki phan khlaw. U Parat Pnan u la wanphai sha krem bad u la khot ïa ka Meirad Wankitkhoh ban ïa peit bha ïa kane ka jaka kaba dap kyrhai da ki soh bad ki phan khlaw bad u la ïawer ïa ka ba lada U Trai Kynrad U shah, kan bha ïa ki ban shong ban sah noh hangta.
Ka Meirad Wankitkhoh haba ka la ïohi ïa kane, ka la mynjur ban sah noh hangne lada U Blei U shah ïa ki ban shong noh hangta. U Parad Pnan u la shim ïa u bai khan bad siang ruh ïa ka sla dot (bret) khaw bad kyrpad ïa U Trai Kynrad la ka bit ne em ban shong ban sah noh ha kata ka jaka. Ka khan ruh ka la jubab ba ka bit ka biang ban shong ban sah noh hangta. Ka la batai ruh ban bam ban dih katba lah, ban trei ban ktah ruh katba ki mon, kumjuh ruh ban kam ïa u pud u sam katba kup ka khan.
Namar ban ïalam ïa ki khun sha shnong ki kur ki jait u shynrang ka long kaba sniew ïa ki longdien mandien, u Parad Pnan u la sngewthuh ïa kane bad ki la ïashong ïa sah noh hangta ha Synrang Bah kumba la batai bad hukum ka khan. Ki la shong la sah ha kane ka krem Synrang Bah haduh ban da waikhoh waistar (kaba mut ba la kut ka jingkha jingpun) bad la kha ki khun haduh phra ngut, 4 (saw) ngut ki kynthei bad 4 (saw) ngut ki shynrang.
Kitei ki khun u Parad Pnan bad ka Meirad Wan ki la ïa rep ha kane ka kper ba la buh da ka kmie bad u kpa kaba long halor u mawsiang haduh ba ki la lah ban thaw noh la ki ïingskum ha ryngkat ka nguh ka dem ïa u Trai Nongbuh Nongthaw ha jrong ha tbian.
Kane ka la long ka thymmei shong shnong ba nyngkong jong ka shnong Nonglyngkien. Mynta ïa kane ka jaka, la khot ka ‘Law Nongbah, bad ïa kane ka synrang ba shong ïing ka Meirad Wan bad u Parad Pnan, la khot ka ‘Synrang Bah’. Ïa ka kper jong ki kaba don halor jong ka mawsiang la khot ka ‘Maw-Wanpnan’ haduh mynta.