Nongstoiñ, Risaw, 22: Ki nongïalam ka Federation of Khasi Jaiñtia & Garo People Kyrshai Area Unit, ki la pynpaw ba ka por ka la dei eh ba ka tnad ka koit ka khiah, kan kyntiew kyrdan noh ia ka Kyrshai Sub Health Centre.
Ka seng halor kane ka bynta ka la dep ban ïakynduh ruh ïa u District Medical & Health Officer jong ka West Khasi Hills, ban ïakren halor ka jingdonkam jong ki paidbah ïa ki lad jingsumar kiba paka ha katei ka thain.
U Samla Francis Sohshang President bad u samla Probin Snar Secretary ka seng, la ong ba ka shnong Kyrshai kaba hap hapoh ka Nongstoiñ C&RD Block, kaba jngai kumba 70 kilomitar na Nongstoiñ lada ïaid lyngba ka Rambrai bad ka don ha khappud bad ka Assam.
Ki don kumba 15 tylli ki shnong kiba hap ha katei ka area ba kynthup ïa ka Mawpun, Nongspung, Ukiam, Borkhuli, Doledonga, Warigro, Umdiengsiar, Hasem, Umthli Umdiengphiang, Talimara, Mawdiangkop, Dariphang, Umbah, Umkhamdor bad Patharphlang, kiba ka jingnang roi ki nongshong shnong ka la kiew man ka por. Kumta ka donkam kyrkieh ban pynbiang ki lad jingsumar kiba kham bha katkum ka jingdonkam jong ki paidbah kiba la nang roi na ka por sha ka por.
Shuh shuh, ha katei ka thaiñ, ka jingpang malaria ka jur bha namar ka dei ka jaka kaba shit bad wat ki khunlung kiba dang hapoh san snem ruh bun kiba ïoh jingpang malaria. Hynrei na ka daw jong ka jingbym don ka jaka sumar kaba biang, kiba ïoh pang malaria ki hap ban shu shaniah beit ha ki Doctor kobiraij ne ki doctor jakoit.
La ong ruh ba kito ki longïing kiba kham ïoh kham kot, ki lah ban leit haduh Boko CHC kaba don ha Kamrup District kaba jngai kumba 50 kilomitar na katei ka thaiñ bad don ruh kiba leit haduh Guwahati. Hynrei kito ki bym biang ka kamai kajih ki la shem shitom haduh katta katta.
Ki nongïalam ka seng ki la ong ruh ba ha katei ka thaiñ, ka don tang kawei ka Sub Health Centre ha Kyrshai, hynrei kam lah pat ban ai ka jingshakri kaba paka katkum ka jingdonkam jong ki paidbah nongshong shnong.
Kumta halor katei ka jingeh kim banse ban shim ïa ka jingkitkhlieh ban dawa na ka sorkar da ki jingthoh lyngba ka District Medical & Health Officer (DM&HO) West Khasi Hills, ba ka sorkar ka dei ban kyntiew kyrdan noh ïa katei ka Sub Health Centre ha Kyrshai sha ka Primary Health Centre khnang ba ki paidbah kin ïoh ïa ka jingsumar kaba biang.
Ha ka jingleit ïakynduh jong ki ïa ka DM&HO, ki la aiti ruh da ka jingthoh ban phah sha ka sorkar ba kan leh ïa kaba donkam. Ki nongïalam ka seng ki la kyrpad ruh ïa u MLA, ba un shimkhia lem ban pynsngew ha ka sorkar halor katei ka jingdawa jong ki khnang ba kiba pang ba shitom kin ïoh ïa ka jingïarap kaba biang.
