Ka mariang kan ym jot lada ka rukom tih marpoh khyndew ka dei da ka juk stad bad jingkitkhlieh: Controller General IBM

Shillong, Jymmang 03 : U Controller General jong ka Indian Bureau of Mines, u Pankaj Kulshrestha ha ka sngi Saitjain u la ong ba ka jingtih ïa ki marpoh khyndew da ka jingkitkhlieh bad da kaba pyndonkam da ki bor ka juk mynta kan ym ktah satia ïa ka mariang hynrei ka lah pynban ban pynneh pynsah khambha shuh shuh ïa ka.
Ïa kane u Controller General ka IBM u la ong haba kren kum u Kongsan ha ka jingïalang pynhap pyrda ïa ka Mines Environment & Mineral Conservation Week kaba long ha Shillong.
Ha kane ka jingïalang kaba la wan ban shim bynta da ki kompeni tih marpoh khyndew bapher bapher u Kongsan u la ong ruh, “Ka jingtih marpoh khyndew da ka jingkitkhlieh bad da ka juk stad kan ym ktah satia ïa ka mariang.”
Shuh shuh u ong ruh ba u la ïohi bun ki jingïapher ha ki par marpoh khyndew lada nujor ha shwa ban tih bad hadien ba la dep tih. Katkum ka jingong jong u, don ki jaka ba shwa ban tih ka jaka ka dei kaba syllen bad tyrkhong hynrei haba tih da ka rukom kaba dei ka jaka ka kylla dur pynban bad don lei lei ki jaka kiba tap da ka jingjyrngam ne ki khlaw.
Da kaba kdew ba ki don ki jaka ha ka ri kiba hap ha ka jingïada ba kyrpang jong ka Riti Synshar jong ka Ri, u Kongsan u la pynpaw ba kano kano ka kam kan bha shibun ban ïoh lang ïa ka jingmynjur na ki trai shnong khamtam haba iadei bad ka jingtih ïa ki marpoh khyndew.
Ha kane ka jingïalang la ïoh ruh ïa ka jingkren na u Symbud Kongsan u Dr. Pukhraj Nenival, Controller of Mines, East Zone IBM, Kolkata, nangta na u George Chacko bad kumjuh na u Ibrahim Sharif bad kiwei kiwei.
Shwa ban sdang ïa kane ka prokram kaba la pynlong da ka jingtreilang ka Indian Bureau of Mines, Guwahati Region bad Lafarge Umiam Mining Pvt. Ltd , la ïoh shwa ïa ka jingpynher ïa ka lama bad ka jingjurip ïa ki kamra pyni nam bapher bapher ba ki kompeni tih marpoh khyndew ki buh ban pyni nam ïa ki tiar jong ki.
Ha kane ka sngi u Kongsan ryngkat ki symbud kongsan ki la pyllait paidbah ïa ki e-souvenir bad ki kalendar, ka jingpyni ïa ka kolshor na ka thain bad ruh ka jingsam ïa ki khusnam sha ki kompeni kiba jop ha ka rukom treikam bha khamtam haba ïadei bad ka jingshngaiñ jong ki nongtrei.
La pynkut ïa kane ka prokram da ka jingaiti pat ïa ka lama kaban shimti ban pynlong pat ïa kane ka jingkynduh lang ha ka sien kynduh lang kaban wan.