Hato ka Sorkar Meghalaya ka don neem ka jingpyrkhat kyrpang ïa ki nongrep kiba im jakpoh na ka rep ka riang? Dang shen ha ki rynsan ïalap elekshon sha ki Constituency kiba don ha ki thain nongkyndong, ki kyrtong jong ki seng saiñpyrthei bapher bapher ki buh thong hakhmat eh ban kyntiew ïa ki nongrep bad ban khmih ïa ka rep ka riang ha ka jylla khnang ban wanrah ïa ka jingkylla dur ha ka kam rep.
Wat ha ki Manifesto ki seng saiñpyrthei bapher bapher ki la buh hakhmat ban kyntiew ïa ka ïoh ka kot jong ki nongrep ha ka jylla.
Bunsien ha ka jingkren ha ki jingïalang paidbah la ju mih ki kyntien ba ka Sorkar kan peit kyrpang na ka bynta ban kyntiew ïa ki nongrep ba kin lah ban kiew ha ka ïoh ïa ka kot. Hynrei kita ki kyntien ki la long pynban tang ki kyntien kiba shu pynbiej ïa ki nongrep, namar lah ban ong kumba 70 percent ki briew ki dang shaniah ha ka rep ka riang bad lada kita ki kyntien kiba la ju kular ka sorkar ban ïarap ïa ki nongrep kam seisoh. Kan jia aiu ïa kito ki nongrep kiba ju im jakpoh na ka rep ka riang?
Ym lah ruh ban len khamtam ha ki jaka nongkyndong bun na ki kmie ki kpa ym tang ba ki kyrshan ban pynim jakpoh ïa ka ing ka sem da ka rep ka riang, hynrei wat ban phah skul ïa ki khun ruh ki hap ban trei shitom da kaba rep ba riang khlem da khein ïa ka ding ka maw, namar ba kim don lad pat da kumwei.
Hynrei kaba sngewsih ban ïohi ba bun na ki nongrep kiba ju trei shitom ban thung ïa ki jingthung jingtep ban jaw syep jaw snam na ka bynta ban pynim jakpoh ïa ka ing ka sem, hynrei phewse ynda haba la dei ka por lum por lang ban die ïa ki mar rep ki mar riang ki hap ban die ïa ki jingthung jingtep ha ka dor kaba tad, katba kiwei ki pat ki jhur ki jhep ne ki jingthung jingtep kiba wan na shabar ka jylla ki don ïa ka dor ka mur kaba biang.
Watla ki nongrep ki trei shitom ban rep baroh saw aiom hynrei ynda la poi ha iew, ki ngat pynban sa ha ka shyngkan khait haba ki shah khñiot dor ha ki nongkhaïi bad sa ka shah ot kilo. Brup! jaw ummat ki nongrep haba ym don ba phai khmat lem na ka bynta ka bha ka miat jong ki.
Hato ka Sorkar ka ïohi mo ïa kine ki jingeh jong ki nongrep ne ban pyrkhat kyrpang ban peit ïa ka iew ka hat, namar kum ban ban ktien kiwei kiwei ki ki marbam ki mardih kiba wan na shabar ka jylla ki dei ki ksiar, katba ka mar rep ba pynmih ki nongrep ka jylla pat kim ïahap shuh ban ong wat ba ka dei ka rupa ruh. Lada ka long ha kane ka rukom shaei kein ka lawei ki nongrep kiba ju kyrshan ïa ka ïing ka sem da kaba rep kaba riang bad wat ban kyrshan ruh na ka bynta ban pynïoh jingnang jingstad ïa ki khun ki kti? Hynrei kaba sngewsih pat ba kita ki nongmihkhmat ba u paidbah u la jied ban peit ïa kum kine ki jingeh ba ki kup shiliang ki sem shiliang ki ïa kynduh ki ïa pynlut por pynban ban ïa knieh shuki ha Assembly.
Ka Sorkar MDA-II kaba la mad teng ïa ka jingeh jong ki nongrep mynba ka khlam jingpang COVID-19 ka la wan lynshop ha kane ka jylla Meghalaya ka la dei ban sngewthuh kham bha ïa kaei kaba ki nongrep ki dang donkam ban kyntiew ïa ka rep ka riang ka jong ki. Toi, watla ka sorkar ka la plie lad lyngba ïa ki nongrep da kaba ai jingïarap na ka FOCUS bad FOCUS+ hynrei ki nongrep kin ïai sah hi junom kum ki nongrep namarba ki jingïarap ki wan eh shisien tengkhat lano eh.
Namarkata, ka la dei ka por ba ka Sorkar MDA-II kan pyrkhat kyrpang ïa ka jingeh jong ki nongrep khamtam ha ki jaka nongkyndong kiba la im da ka rep ka riang, namar lada ka Sorkar kam don ïa ka jingkitkhlieh ban peit kyrpang ïa ka dor kyrshan lane ka Minimum Support Price (MSP) ki nongrep kin ïakynduh jingeh hi kumjuh.
Ha kum kane ka juk ba la kyrduh kamkyrduhjam, ka Sorkar ka la dei ruh ban thaw ïa ki lad ki lynti ( Plan and Policy) kumno ban kyntiew shisha ïa ki nongrep ka ban long ka lad ïohkam ïoh jam ïa ki samla, bad kaba sngewduh mynsiem pat ïa ki paidbah ka dei tang ka jingkular ha ki jingthoh bad khlem ka kam ban kyntiew ïa ki nongrep ne wat ïa ki samla kiba ym donkam donjam.
