Shillong, Lber 15 : Ka Jylla Meghalaya katba nang mih ki sngi ka la nang paw pyrthei bad kiew shaphrang ha ka liang ki jingïalehkai, na ka jingtbit bad ka jingpyndonkam hok jong ki nongïalehkai ïa ki sap ba ki don ha ki jingïalehkai bapher bapher.
Ka Jylla Meghalaya mynta ka kynti ka la ïoh sa kawei ka nam bad ka burom lyngba ki saw ngut ki nongïalehkai Jeet Kune Do kiba la khur jingjop ha ka lympung ïalehkai Jeet Kune Do kaba la tip kum ka 2nd World Jeet Kune Do Championship kaba dang shu kut shen ha Sri Lanka.
Kine ki saw ngut ki samla ïalehkai kiba mihkhmat na ka Meghalaya Jeet kune Do Association ha ka 2nd World Jeet Kune Do Championship kaba long ha Sri Lanka ha ka 10 tarik haduh ka 12 tarik Lber 2023, ki kynthup u samla Francis R.R Songthiang uba ïakhun ha ka kyrdan jingkhia ba 60 kg, samla Ribhalin Marbaniang ba ïalehkai ha ka kyrdan ba 52kg.
Ka samla Ilawankmen Nongbri ba ïalehkai ha ka kyrdan jingkhia ba 48kg bad ka samla Lorenza Songthiang kaba ïalehkai ha ka kyrdan jingkhia ba 54kg.
U samla Francis R.R Songthiang bad ka samla Lorenza Songthiang kidei ki khun jong ka Kong Anita Songthiang ba shong ba sah ha Laitkor Kynton U Mon, ka samla Ribhalin Marbaniang kadei ka khun jong ka Kong Bianglin Marbaniang ba shong ba sah ha Umkynrud Kynjat Phutbol ba dang pule ïa ka klas 12 ha Umshyrpi College, ka samla Ilawankmen Nongbri kadei ka khun jong u Liverson Kharnadu kiba shong ba sah ha Lawsohtun Block-4.
Halor kane ka jingjop na ka liang ka Association ha ryngkat ka KSU Nongthymmai Circle bad ka KSU Laban Circle ki la pdiang burom ïa kine ki saw ngut ki samla kiba la wanrah ïa ka nam bad ka burom ïa ka ïing ka sem, ïa ka Jylla bad ïa ka ri India hi baroh kawei.
Ka Meghalaya Jeet Kune Do Association ka ai khublei kyrpang ïa kine ki samla bad kitbok kitrwiang ba kin ïoh ka met ba koit ba khiah bad ba kin nang kiew shaphrang ha ki jingïalehkai kiban dang wan.
Kum ban pynkynmaw hangne ba ka kynhun ïalehkai phutbol ka Jylla Meghalaya ki la ïoh ban rung sha ka phainal ha ka Santosh Trophy kaba dang shu kut shen ha Saudi Arabia kaba dei ruh ka sien kaba nyngkong ba ka Jylla kan ïoh ban rung shaduh ka phainal ha kaba kum katei ka lympung.
Ha ka jingïalehkai phainal, ka Meghalaya ka la rem salit da 2-3 kol ha ka Karnataka.
