Shillong, Ïaïong 05: U nongïalam ka HSPDP u Bah Martle Mukhim ha ka sngi Ba-ar u la pynpaw ba na ka liang jong u u sngewdei ba ka Reservation Policy jong ka sorkar jylla dei ban pynkylla noh kat kum ka jingdawa ka por bad ka jingdon ki nongshong shnong na ki ar tylli ki jaidbynriew trai muluk ka jylla namar ka rai ban bhah ba mar 40% hapdeng ki Khasi bad ki garo ka la dei ka rai kaba la bakla naduh ka sngi kaba nyngkong eh.
Haba kren sha ki lad pathai khubor u Bah Martle u la ong ba kane ka jingbhah ba 40% ïa ki Khasi bad 40% ïa ki Garo ha ka jingshisha lada bhah dei ban bhah beit 80% ïa ki riewlum trai muluk Khasi bad Garo ha ka juh ka bhah khlem da pynïapher hapdeng ki ar ne lada dei ba ki bhah da kaba pynïapher jaidbynriew dei ban ai bhah kat kum ka jingdonpaid jong ki.
“Naduh kaba sdang ki la bakla ïa kane ka mat bad nga sngewdei ba naduh kato ka por dei ban bhah beit 80% ïa ki Khasi bad Garo ha ka juh ka bhah bad lada ki leh kumba ki leh mynta ruh da kaba bhah ïa u Khasi bad u Garo ruh dei ban aibhah kat kum ka jingdon paid jong kine ki jaidbynriew ym ban shu ai beit mar 40%,” u la ong.
Haba ïadei bad ka jingkhih phaloh ka jingdawa ban pynkylla ïa kane ka Policy u Bah Martle u la ong ba ka jingdawa ka dei kaba shongnia namar kumba long mynta ka la noh shiliang shaba palat bad ka dei kaba shongnia ïa ka sorkar ban pynkylla noh ïa kane ka policy ka sorkar jylla.
