Shillong, Nailar 04: Hadien ka jingsaphriang ka khubor ba ki kynhun ka niam Hindu ki thmu ban leit pynlong jinglehniam hapoh ka krem Mawjymbuiñ ha ka 10 bad 11 tarik mynta u bnai, na ka liang ka Khun Hynñiewtrep National Awakening Movement (KHNAM) ha ka sngi u Blei, ka la pynpaw ïa ka jingkmen halor ka rai jong ka Dorbar Shnong Mawsynram ban khanglad ïa ki riewngeit Hindu kiba thmu ban pynkylla jaka mane Blei Hindu ha ka jaka kyntang u Khasi.
U Working President ka KHNAM u Bah Thomas Passah ula ong, “Ka seng ka dap da ka jingsngewkmen halor ka rai kaba ka Dorbar Shnong Mawsynram ka la shim pyrshah bad khanglad ïa ki nongïaid pilgrim jong ki riewngeit Hindu, kiba la pyrshang ban pynlong jaka mane Blei ïa ka jaka kyntang jong u Khasi, kumba la buh da u longshuwa manshwa”.
“Ka krem Mawjymbuiñ kaba don ha Mawsynram ka don ka jingïathuh khana kaba kyrpang da ki spah snem mynta bad ka dei ruh kawei na ki jaka jngohkai pyrthei ba paw bha ha ka jylla. La katto katne snem kine ki riewngeit ki la pynlong ïa kata ka jingïaid kjat ryngkat ka riam katkum ka jingngeit niam ka jong ki, ha ryngkat ka jingrah ïa ki jingkñia bad kiwei kiwei da ka jingpyrshang ban pynlong jaka mane Blei ïa katei ka jaka jngohkai pyrthei,” ong u Bah Thomas.
“Ngi pynpaw ka jingsngew sarong bad ngi ïaroh ïa ka Dorbar Shnong ka Mawsynram kaba la lah ban ïohi ïa ka jingma ba lah ban wan lada ym shimkhia. Ka seng ka don bad kan ïai don ryngkat bad ka Dorbar Shnong halor kane ka jingthmu,” la pynkut u nongïalam ka KHNAM.
Lah ban ong, kawei ka kynhun jong ki riewngeit Hindu ka la pynbna ban pynlong ïa ka jingïaid kjat ne Yatra ban leit sha Krem Mawjymbuiñ kaba don ha Mawsynram ha ka 10 tarik mynta u bnai bad halor kane ka jingthmu wat na ka liang ka Dorbar shnong ka la khanglad bad ka khlem da la ai jingbit satia halor kane ka jingthmu jong katei ka kynhun niam.
