Mawkyrwat, Naitung, 04: U Mawlyngdoh Nongsynrieh u don hapoh ka khyndew jong ka jait Nonglang Saw Kpoh Nongsynrieh. U don sha ka phang shatei lam mihngi jong ka shnong Nongsynrieh, South West Khasi Hills District kaba hap hapoh jong ka Mawkyrwat C&RD Block. La tap ïa une u Maw ha ki phew bad spah snem mynshwa da ki diengbah diengsan jong ka khlaw niam ki Kur Nonglang. Dei ha ka snem 1967 ba ki Kur Nonglang ki la pom lut ïa kita ki dieng na kane ka khlaw kyntang namar ym shym la don shuh ka lehniam bad ka kñia ka khriam.
Haba la pom lut ïa kine ki dieng ba tap ïa une u Mawlyngdoh, u la paw bad ïohi bha hab apeit na shaphang shatei haduh lum Mawthadrainshan, phang sepngi naduh u lum Kyllai Longsngun bad phang mihngi naduh ki thaiñ Laitnongrim bad Nongspung. Na ka phang shathie ym lah ban ïohi bha ïa u Mawlyngdoh namar la kah ne ker da u Lum Nongsynrieh.
Ka jingheh une u maw lada thew:
** Na Mihngi sha sepngi ka lynter ka long 76 meter.
** Na shathie sha shatei ka lynter ka long 320 meter.
** Ka jingkynjang une u maw naduh trai haduh sha jrong ka long 172 meter.
Na ki mawlong, mawteh lah ban ong u long u maw uba heh bad kynjang tam hapoh ka South West Khasi Hills District. Ha ka jingjrong jong une u Mawlyngdoh la tap da ka khyndew bad ki tymmen jong ka shnong Nongsynrieh naduh ki phew snem ba mynshwa ki ju leit thung phang bad riewhadem halor une u maw.
Ka jingïathuh khana pateng ki tymmen ki ong ba une u Mawlyngdoh u shong halor jong u Lum Nongsynrieh bad lah ban ïohi ïa ka them jong ka ri East Pakistan ba la khot ka Ri Bangladesh mynta lada kiew halor une u Mawlyngdoh. Haba peit ïa ka spah snem ba mynshwa la i dei ba ha ki spah snem ba mynshwa u shong ha jrong une u lum, namar mynta ka don ka dak pynïakhlad ïa une u maw bad u lum.
Hajrong jong une u Mawlyngdoh lah ban kiew tang ka phang shathie bad phang satei tang ki briew kiba dang eh dang khlaiñ. Ïa kiba la kham tymmen ruh lah ban btin ba kin kiew haduh jrong jong une u maw. Na ka phang mihngi jong une u maw ruh lah ban kiew ïa ki ranab tang da ki khun samla shynrang kiba don ka met kaba sting bad khlaiñ.
Haduh mynta halo rune u Mawlyngdoh ka dang don ka khyndew kaba dang sah, hynrei ha ki rud sawdong jong une u maw ki dieng soh lang mut kiba soh bad mih ki la hap lut na ka jingtyrkhong hadien ba la pom lut ïa ki dieng kiba tap ïa une u maw. Ha kjat kaba dei ha ka phang shathie jong une u Mawlyngdoh ka don ka lum kaba long jaka saitjaiñ jong ki ïing ki sem ka shnong Nongsynrieh.
Ka Shnong Nongsynrieh bad ki Kur Nonglang ki la sdang ban pynbha ïa ka jaka sawdong jong une u Mawlyngdoh na shaphang mihngi la tih ïa ka surok shispah sngi na ka PWD (R) bad pynpoi haduh ha syndah u Mawlyngdoh, na ka ‘phang shatei la sdang ban shna ïa ka dam um ban pynlong pung ban sum ban sait bad jngi sngewbha.
Ka Shnong ka la buh jingmut ban pynbit pynbiang ïa ka jaka shongkai sawdong une u Mawlyngdoh bad u Lum Nongsynrieh, khnang ba kan long ka jaka jngohkai ïa ki briew kiba najan bad najngai bad kan long ruh kum kawei ka Tourist Spot.
