Ka kam nongmihkhmat kam dei tang ka kam sam blanket, buh mawnongrim, sam tin, hynrei ban thaw ïaki policy treikam ba biang

Nongpoh, Lber 09: Ka kam nongmihkhmat kam dei tang ka kam sam work order, sam blanket, sam tin sop ïing, buh mawnongrim, khap ribbon, leit ïing ïap briew, hynrei kaba kongsan ban long kum u nongïalam ban kit ban bah ïaka khia ka shon jong ki paidbah ka constituency, ban pynsngew ïaki jingeh, ki jingdonkam jong ki paidbah ha ïing Dorbar thawaiñ ka jylla khamtam ban thaw ïaki aiñ bad ki policy kiba biang ban kyntiew ïaka jylla.
Kum ki nongïalam ki dei ban iohi jngai ha kaba ïadei bad ka jinglong trai ka khyndew ka shyiap, ka riti ka dustur, ka kam ïap kami m jong ka jaitbynriew, ban thaw ki lad ki lynti, ki policy treikam bapher bapher naka bynta ka bha ka miat bad ka jingmyntoi jong ki paidbah, ban wanrah ïaka shongsuk shongsaiñ, ka synshar khaddar paidbah kaba khuid, ban long ki nongmihkhmat ki nongïalam kiba don ka jingkitkhlieh, ki ban long ki nongsaiñ dur naka bynta ka lawei ba phyrnai haka imlang ka sahlang ki pateng ban wan.
Hynrei kaba sngewsih ka long ba ngi ki paidbah ngi la shu jied matlah khlem da bishar bñiah ngi la shu pynlong blei thaw ha kita kiba lah ban ai pisa, ai kyiad haka por elekshon, ngi la jied da ki nongmihkhmat nongthaw pisa hapoh assembly, haka jaka ban jied da ki nongïalam kiba lah ban thaw ïaki aiñ, namar ki don ki nongmihkhmat nongthaw pisa ki long kum u thlong ha ïing Dorbar thawaiñ ka jylla kiba shu leit shong kai, shu long tang ki nongpeitkai katba kiwei ki para nongmihkhmat ki ïa shim bynta ban ïa tai ïa thir naka bynta ka jingeh jong ki paidbah ka jylla ha ïing Dorbar.